శివాజీరాజా, న‌రేష్ క‌లిసిపోయారు... తెర వెన‌క ఏం జ‌రిగింది..?

మూవీ ఆర్టిస్ట్ అసోసియేష‌న్(మా) ఈమ‌ధ్య కాలంలో బాగా వార్త‌ల్లో ఉంటుంది. క్యాస్టింగ్ కౌచ్ పేరుతో శ్రీరెడ్డి సినిమాని వార్త‌ల్లోకి తీసుకువ‌స్తే... ఇప్పుడు శివాజీరాజా, సీనియ‌ర్ న‌రేష్ క‌లిసి మరోసారి వార్త‌ల్లోకి తీసుకువ‌చ్చారు. యు.ఎస్‌లో మా సెల‌బ్రేష‌న్స్ నిర్వ‌హించారు. ఈ కార్య‌క్ర‌మానికి మెగాస్టార్ చిరంజీవిని ముఖ్య అతిధిగా తీసుకెళ్లారు. అయితే... ఈ ఈవెంట్ నిధులు దుర్వినియోగం జ‌రిగాయంటూ న‌రేష్ మీడియాకెక్క‌డంతో వివాద‌స్ప‌దం అయ్యింది. న‌రేష్ వ్యాఖ్య‌ల‌కు శివాజీరాజా కూడా ఘాటుగా స‌మాధానం చెప్ప‌డం.. దుర్వినియోగం జ‌రిగాయ‌ని నిరూపిస్తే త‌న ఆస్థి అంతా రాసి ఇచ్చేస్తాన‌నడంతో ఈ వివాదం మ‌రింత ముదిరింది.

అయితే... న‌రేష్, శివాజీరాజా ఇద్ద‌రూ కూడా చిరంజీవి పేరు ప్ర‌స్తావించ‌డంతో చిరుకి బాగా కోపం వ‌చ్చింద‌ట‌. అంతే... ఇద్ద‌రినీ ఇంటికి పిలిచి బాగా క్లాస్ తీసుకున్నార‌ట‌. మ‌రోవైపు త‌మ్మారెడ్డి భ‌ర‌ద్వాజ కూడా న‌రేష్, శివాజీరాజా ఇద్ద‌రూ మీడియాకెక్కి ఇండ‌స్ట్రీ ప‌రువు తీసేస్తున్నార‌ని చెప్పారు. దీంతో చిరంజీవి, సురేష్ బాబు, త‌మ్మారెడ్డి భ‌ర‌ద్వాజ రంగంలోకి దిగి ఈ వివాదాన్ని ప‌రిష్క‌రించార‌ట‌. ఇంకెప్పుడు ఇలా మీడియాకెక్కి ప‌రువు తీయ‌వద్ద‌ని చెప్పార‌ట‌. దీంతో న‌రేష్ - శివాజీరాజా మామ‌ధ్య ఎలాంటి విభేదాలు లేవ‌ని ప్రెస్ మీట్ పెట్టి మ‌రీ చెప్పారు. అదీ..సంగ‌తి..!