'మత్తు'తో నాకు సంబంధమే లేదు : సినీ నటి హేమ

హైదరాబాద్ నగరంలో డ్రగ్ కల్చర్ విపరీతంగా పెరిగిపోతోంది. దీన్ని అరికట్టేందుకు తెలంగాణ పోలీసులు ఎన్నో రకాలైన చర్యలు చేపడుతున్నారు. అయినప్పటికీ ఈ డ్రగ్ కల్చర్ తగ్గడం లేదు. పబ్‌లు, రేవ్ పార్టీల్లో జోరుగా సరఫరా అవుతుంది. తాజాగా ఓ నక్షత్ర హోటల్‌లో శనివారం రాత్రి జరిగిన ఓ పబ్ పార్టీలోనూ లిక్విడ్ డ్రగ్ సరఫరా అయినట్టు హైదరాబాద్ జూబ్లీ హిల్స్ పోలీసులు గుర్తించారు. ఈ డ్రగ్స్ వ్యవహారంపై సినీ నటి హేమ స్పందించారు. 

ఈ కేసులో అనవసరంగా తన పేరును ప్రస్తావిస్తున్నారని ఆరోపించారు. ఏ సంబంధం లేదని తనను ఎందుకు బదనాం చేస్తున్నారంటూ ఆగ్రహం వ్యక్తం చేశారు. బంజారా హిల్స్‌లోని రాడిసన్ బ్లూ ప్లాజా హోటల్‌లో ఉన్న ఫుడింగ్ అండ్ మింక్ పబ్‌లో పోలీసులు ఆదివారం వేకువజామున 3 గంటల ప్రాంతంలో తనిఖీలు చేసిన విషయం తెల్సిందే. 

ఇందులో బిగ్ బాస్ విన్నర్ రాహుల్ సిప్లిగంజ్, సినీ నటి, మెగా డాటర్ నిహారిక రొణిదెలతో పాటు పలువురు సినీ ప్రముఖులను అదుపులోకి తీసుకున్నారు. ఆ తర్వాత వీరికి నోటీసులిచ్చి వదిలివేశారు. అయితే, ఆ పబ్‌కు తాను వెళ్లలేదని, కానీ కొన్ని మీడియా సంస్థలు పనిగట్టుకుని తన పేరును ప్రస్తావిస్తూ అభాండాలు వేస్తున్నాయని నటి హేమ ఆరోపించారు.