అల్లు అర్జున్ సర్ ప్రైజ్.. పుష్ప-2 డైలాగ్ చెప్పేశాడుగా!
శుక్రవారం, 21 జులై 2023 (15:27 IST)
పుష్ప సినిమాలోని తగ్గేదేలే డైలాగ్ సినీ ప్రియులను ఎంతగా అలరించిందో ప్రత్యేకంగా చెప్పనవసరం లేదు. ఆ సినిమా సీక్వెల్‌గా వస్తున్న పుష్ప-2లో అల్లు అర్జున్ ఎలాంటి పంచ్ డైలాగ్ చెప్పబోతున్నాడో అని అభిమానులు ఉత్కంఠగా ఎదురుచూస్తున్నారు.
ఈ నేపథ్యంలో అల్లు అర్జున్ అభిమానులకు ఊహించని సర్ ప్రైజ్ ఇచ్చాడు. సాయి రాజేష్ దర్శకత్వంలో ఆనంద్ దేవరకొండ నటించిన బేబీ చిత్రం ఇటీవల విడుదలై మంచి ఆదరణ పొందుతోంది. దీంతో ఈ చిత్ర నిర్మాతలు హైదరాబాద్‌లో సక్సెస్ మీట్ నిర్వహించారు.
ఈ కార్యక్రమానికి అల్లు అర్జున్ ముఖ్య అతిథిగా హాజరయ్యారు. బేబీ మూవీని అభినందిస్తూ, చిత్ర బృందానికి శుభాకాంక్షలు తెలిపారు. చివర్లో అభిమానులు పుష్ప-2 డైలాగ్ అడగడంతో పంచ్ డైలాగ్ చెప్పాడు.
"ఇదంతా జరిగేది ఒకటే రూల్ మీద జరుగుతుంది, పుష్ప గాడి రూల్" (ఏం జరిగినా అది పుష్ప రూల్ ప్రకారమే జరుగుతుంది అని అర్థం వచ్చేలా డైలాగ్)" అని అల్లు అర్జున్ అన్నారు. ఈ డైలాగ్ ప్రస్తుతం అభిమానుల్లో సంచలనం రేపుతోంది.
