స్వీటీ స్లిమ్ అయ్యింది.. అమరేంద్ర బాహుబలితో పాట పాడుకుంటోంది..

బాహుబలి-2 సినిమా షూటింగ్ శరవేగంగా జరుగుతోంది. ద‌ర్శ‌క‌ధీర రాజ‌మౌళి తెర‌కెక్కించిన బాహుబ‌లికి ప్రపంచ వ్యాప్తంగా మంచి గుర్తింపు లభించిన సంగతి తెలిసిందే. తెలుగు సినిమా వైపు ప్రపంచ సినీ ప్రేక్షకులు తిరిగి చూసేలా చేసిన రాజమౌళి.. బాహుబ‌లి2 మూవీ కోసం వేయి కనులతో ఎదురుచూస్తున్నారు.  

బాహుబలి-ది బిగినింగ్‌కు "ది కన్ క్లూజన్'' జతచేసే పనిలో బిజీగా రాజమౌళి.. ఇప్పటికే క్లైమాక్స్ షూట్ పూర్తి చేశాడు. ప్రస్తుతం సాంగ్ షూట్ మొదలుపెట్టాడు. ఎన్ని రోజులు యుద్దాలు, పోరాటాలతో ఒళ్ళు హూనం చేసుకున్న అమరేంద్ర బాహుబలి (ప్రభాస్) ప్రస్తుతం ఎంచక్కా దేవసేనతో పాట పాడుకుంటూ స్టెప్పులేసుకుంటున్నాడు. 

రామోజీ ఫిలిం సిటీలో మూడు నెలలు కేవలం క్లైమాక్స్‌తో గడిపిన రాజమౌళి, ప్రస్తుతం పాటల చిత్రీకరణ ప్రారంభించాడు. ప్రస్తుతం అనుష్క, ప్రభాస్‌లపై సాంగ్ షూట్ జరుగుతుంది. మరోపక్క కీరవాణి సైతం రీ రికార్డింగ్ పనులు పూర్తి చేసాడు. అనుష్క బరువు తగ్గడం కోసం ఇన్నాళ్లు వేచి చూసిన రాజమౌళి.. ప్రస్తుతం అమ్మడు స్లిమ్ కావడంతో పాటల చిత్రీకరణ స్టార్ట్ చేశాడు. ఈ పాటలు పూర్తికాగానే సిజి వర్క్ ప్రారంభం కానుంది. అన్ని పనులు పూర్తి చేసుకుని సినిమాను 2017 ఏప్రిల్ 28వ తేదీన రిలీజ్ చేసేందుకు జక్కన్న రంగం సిద్ధం చేస్తున్నాడు.