అందాల పోటీల్లో గెలిచిన భామలందరూ సినీ అరంగేట్రం చేయడం మామూలే. తాజాగా 17 ఏళ్ల తర్వాత భారత దేశానికి మిస్ వరల్డ్ కిరీటం సంపాదించిపెట్టిన మానుషి చిల్లర్ కూడా తనకు సినిమాల్లో రావాలనే కోరికను వెల్లడించింది. బాలీవుడ్‌లో నటించాల్సి వస్తే మాత్రం మిస్టర్ ఫర్‌ఫెక్ట్ అమీర్ ఖాన్ సరసన నటించాలని చిల్లర్ వెల్లడించింది.
పనిలో పనిగా అమీర్ ఖాన్ వైవిధ్యమైన సినిమాల్లో నటిస్తాడని.. ప్రతి సినిమాలో వెరైటీ వుండేలా చూసుకుంటాడని తెలిపింది. ఇక అమీర్ ఖాన్ సినిమాలో సందేశం దాగివుంటుందని చెప్పుకొచ్చింది. అలాగే బాలీవుడ్‌ నటీనటులంతా ఇష్టమేనన్న మానుషి చిల్లర్.. అమీర్ ఖాన్, ప్రియాంక చోప్రా తన అభిమాన నటీనటులని తెలిపింది.
మిస్ వరల్డ్ కిరీటాన్ని తమ దేశానికి చెందిన యువతులు కూడా సులభంగా గెలుచుకుంటారని చెప్పుకుంటున్న పాకిస్థాన్ వ్యాఖ్యలపై మానుషి చిల్లర్ స్పందిస్తూ.. అందం ఇక్కడ ముఖ్యం కాదని, ఏ దేశానికి ప్రాతినిధ్యం వహించినా.. ప్రపంచానికి మొత్తానికి ఏ విధంగా దోహదపడ్డామన్నదే ముఖ్యమని తెలిపింది.
