టాలీవుడ్ 'మన్మథుడు'గా గుర్తింపు పొందిన హీరో అక్కినేని నాగార్జున. ఈయన గత యేడాది రెండు మంచి విజయాలను సొంతం చేసుకున్నాడు. గత సంక్రాంతికి విడుదలైన 'సోగ్గాడే చిన్ని నాయనా', ఆ తర్వాత విడుదలైన 'ఊపిరి' వంటి రెండు డిఫరెంట్ జానర్ మూవీస్ రిలీజ్ చేసి సక్సెస్ అయ్యాడు.
2017 సంవత్సరంలోనూ ఇదే జోష్‌ను కొనసాగించాలన్న పట్టుదలతో నాగార్జున ఉన్నాడు. ఇందులోభాగంగా, నాగార్జున నటించిన భక్తిరస చిత్రం 'ఓం నమో వేంకటేశాయ' చిత్రం వచ్చే నెలలో విడుదల కానుంది. ఈ సినిమాకు కె.రాఘవేంద్ర రావు దర్శకత్వం వహించారు. 'అన్నమయ్య ', 'శ్రీరామదాసు' వంటి హిట్స్ తర్వాత కె.రాఘవేంద్రరావు దర్శకత్వంలో నాగార్జున చేస్తున్న భక్తి చిత్రం కావడం ఈ మూవీకి ప్లస్ అయ్యింది.
ఈ చిత్రం తర్వాత 'రాజుగారి గది' సీక్వెల్‌లో నటించనున్నాడు. ఈ మూవీతో నాగార్జున ఫస్ట్ టైం హారర్ కామెడీ ట్రై చేస్తున్నాడు. పివిపి ప్రొడ్యూస్ చేస్తున్న ఈ మూవీని ఓంకార్ డైరెక్ట్ చేస్తున్నాడు. ఆ తర్వాత మరో యంగ్ డైరెక్టర్ చందూ మొండేటితో మూవీ చేయబోతున్నాడు. 'కార్తికేయ', 'ప్రేమమ్' లాంటి డిఫరెంట్ సబ్జెక్ట్‌తో హిట్ ఇచ్చిన చందూ.. నాగార్జున కోసం ఓ యాక్షన్ ఎంటర్టైనర్ రెడీ చేశాడు. ఈ చిత్రం షూటింగ్‌ను వేసవిలో ప్రారంభించి యేడాది ఆఖరుకు విడుదల చేయాలన్న ప్లాన్‌లో ఉన్నాడు. మొత్తం ఈ యేడాది మూడు చిత్రాలతో ప్రేక్షకులను ఆలరించాలన్న పట్టుదలతో నాగార్జున ఉన్నారు.
