ఈ క్రిస్మస్‌కి సినిమాల సందడి నాలుగు రోజుల ముందే మొదలవబోతోంది. ఇందులో మొదటగా నాని నటించిన MCA(మిడిల్ క్లాస్ అబ్బాయి) ఈ నెల 21వ తేదీన రిలీజు కానుంది. నాని ఈ సంవత్సరం ఇప్పటికే 'నేను లోకల్', 'నిన్ను కోరి' సినిమాలతో హిట్లు అందుకున్నా, ఈసారి హ్యాట్రిక్ కోసం గట్టిగానే ప్రయత్నిస్తున్నాడు. అందులో 'ఫిదా' ఫే‌మ్ సాయిపల్లవి కథానాయికగా నటిస్తోంది. వీరిరువురు మంచి ఫామ్‌లో ఉండటంతో సినిమాపై భారీ అంచనాలు నెలకొన్నాయి.
మరోవైపు నాగార్జున రెండో తనయుడు అఖిల్ కూడా 'హలో' అంటూ తెలుగు ప్రేక్షకులను పలకరించడానికి 22వ తేదీన థియేటర్లలోకి రానున్నాడు. మొదటి సినిమా 'అఖిల్'ని ప్రముఖ హీరో నితిన్ 50 కోట్ల భారీ బడ్జెట్‌తో తెరకెక్కించినప్పటికీ ఈ సినిమా ఆశించిన స్థాయిలో ఆడకపోయేసరికి రెండో చిత్రమైన హలోపై భారీగా ఆశలు పెట్టుకున్నాడు అక్కినేని వారసుడు.
ఈ సినిమా తనకు అతి ముఖ్యమైన మలుపుగా భావించవచ్చు, ఎందుకంటే నాగార్జున ఈ సినిమాని స్వయంగా తానే నిర్మిస్తూ తన వారసుడి హిట్ కోసం చాలా జాగ్రత్తలు తీసుకుంటున్నాడు. మనం సినిమాలో అక్కినేని కుటుంబాన్ని ఒకే ఫ్రేమ్‌లో చూపిన దర్శకుడు విక్రమ్.కె.కుమార్ ఈ సినిమానికి దర్శకత్వం వహిస్తున్నాడు. ఇందులో కళ్యాణి ప్రియదర్శని హీరోయిన్‌గా చేస్తున్నారు.
ఇవే కాకుండా అల్లు శిరీష్ నటించిన 'ఒక్క క్షణం', అడివి శేష్ నటించిన 'గూఢచారి' సినిమాలు కూడా క్రిస్మస్‌కి విడుదల కానున్నాయి. ఇలా చాలారోజుల తర్వాత తెలుగు సినిమాలు వరుసగా బాక్సాఫీస్ యుద్ధానికి సిద్ధమయ్యాయి. వీటిలో ఏది విజయం సాధిస్తుందో చూడాలంటే మరికొన్ని రోజులు ఆగాల్సిందే మరి.
