క్యాస్టింగ్ కౌచ్ వ్యవహారంలో ఒక్కసారి వెలుగులోకి వచ్చిన నటి శ్రీరెడ్డి. ఈ క్యాస్టింగ్ కౌచ్ కాస్త మరో మలుపుతిరిగి జనసేన పార్టీ అధినేత పవన్ కళ్యాణ్ కుటుంబానికి తాకింది. ఈ వివాదం మరింతగా రాజుకోవడంతో శ్రీరెడ్డి సారీ చెప్పింది. ఆ తర్వాత ఆమె మౌనంగా ఉంటోంది. ప్రస్తుతం తాను మౌనంగా ఉన్నానని, అయితే సముద్రాన్ని కబళించే రోజు దగ్గర్లోనే ఉందని వ్యాఖ్యానించింది.
ఈ మేరకు తన ఫేస్‌బుక్ ఖాతాలో ఓ పోస్టు పెడుతూ, 'వింటున్నా ప్రతి సుత్తి దెబ్బనీ, చూస్తున్నా ప్రతి కలుపు మొక్క ఎదుగుదలనీ, భరిస్తున్నా నా వంటిపై పడుతున్న వేడివేడిగా కాల్చిన వాతలని, నా మౌనం సముద్రాన్ని కదిలించే రోజులు దగ్గర్లోనే ఉన్నాయి' అని వ్యాఖ్యానించింది.
అంతకుముందు ఓ కవితను పోస్టు చేస్తూ, జీవితం ఓడించిన ప్రతిసారీ ఓ పక్షిలా రెక్కలు విప్పుకోవాలని ఉంటుందని, భూమిని చీల్చుకునే విత్తులా తలెత్తాలని ఉందని చెప్పింది. కాగా, శ్రీరెడ్డి టాలీవుడ్‌లో క్యాస్టింగ్ కౌచ్‌పై వినూత్న రీతిలో నిరసన తెలిపి, మహిళా సంఘాల మద్దతు కూడగట్టి, ఉద్యమాన్ని లేవదీసి, సినీ ఇండస్ట్రీని కదిలించిన విషయం తెల్సిందే.
