కర్ణాటక మాజీ మంత్రి, మైనింగ్ సామ్రాజ్యానికి అధిపతి గాలి జనార్ధనరెడ్డి కూతురికి సంబంధించిన పెళ్లి కార్డ్ ఆసక్తి రేకెత్తిస్తోంది. అక్రమ మైనింగ్ కేసులో జైలు శిక్షను అనుభవించి, ఇటీవలే బెయిల్ మీద విడుదలైన గాలి జనార్ధన రెడ్డి కుమార్తె బ్రహ్మిణి వివాహం వచ్చే నెలలో జరగనుంది. గత నెలలో నిశ్చితార్థం ఘనంగా నిర్వహించిన గాలి కుటుంబం, చరిత్రలో నిలిచిపోయే విధంగా పెళ్లిని అంగరంగ వైభవంగా చేసేందుకు సిద్ధమయ్యారు.
ఈ వివాహానికి సంబంధించిన ఆహ్వాన పత్రిక చూస్తే ఎవరైనా ఆశ్చర్యపోవాల్సిందే. ఇందుకోసం ప్రత్యేకంగా ఓ వీడియోతో ఆహ్వాన పత్రికను ఒక ఖరీదైన జ్యూయలరీ బాక్స్‌ రూపంలో రూపొందించారు. దీని ప్రత్యేకత ఏమిటంటే తెరిచి చూడగానే, మాయాబజార్ సినిమాలో కనిపించినట్లు వీడియో ప్లే అవుతుంది. పెళ్లికి తరలి రావాల్సిందిగా ఆహ్వానిస్తున్న గాలి కుటుంబం ఆ వీడియోలో కనిపిస్తుంది.
బ్రహ్మణి వెడ్స్ రాజీవ్ రెడ్డి అనే వధూవరుల పేర్లతో ఈ వీడియో మొదలవుతుంది. ఈ వీడియో ఇప్పుడు పలువురిని ఆకట్టుకుంటోంది. అతిథి దేవోభవ అంటూ మొదలయ్యే ఈ వీడియో సాంగ్‌ జనార్దన రెడ్డి తన కుమార్తె వివాహ తేదీని.. వేదికను చెప్పడంతో ముగుస్తుంది. పెళ్లి కార్డుతోనే ఇంత హంగామా చేసిన గాలి కూతురి పెళ్లిని ఇంకెంత ఘనంగా చేస్తారో చూడాలి.
