భారీ వర్షాలు, వరదలతో అల్లాడుతున్న తెలంగాణలో ప్రస్తుత పరిస్థితులపై ముఖ్యమంత్రి రేవంత్ రెడ్డి కేంద్ర హోంమంత్రి అమిత్ షాతో ఫోన్‌లో మాట్లాడారు. ఈ సందర్భంగా సీఎం రేవంత్‌రెడ్డి వరదల వల్ల జరిగిన నష్టాలను వివరించారు.
ఎలాంటి ప్రాణ నష్టం జరగకుండా అన్ని జాగ్రత్తలు తీసుకున్నామని హోంమంత్రికి హామీ ఇచ్చారు. దీనిపై అమిత్ షా స్పందిస్తూ తెలంగాణకు కేంద్ర ప్రభుత్వం తక్షణ సాయం అందిస్తుందని, ప్రస్తుతం జరుగుతున్న వరద సహాయక చర్యలకు సహకరిస్తామని హామీ ఇచ్చారు.
భారీ వర్షాల మధ్య, ముఖ్యమంత్రి రాష్ట్ర స్థాయి అధికారులు, అన్ని ప్రాంతాల నుండి జిల్లా కలెక్టర్లతో నిరంతరం సంప్రదింపులు జరుపుతూ, పరిస్థితిపై ఎప్పటికప్పుడు సమీక్షలు నిర్వహిస్తున్నారు. ఎలాంటి అవాంఛనీయ సంఘటనలు జరగకుండా అన్ని జాగ్రత్తలు తీసుకోవాలని, అప్రమత్తంగా ఉండాలని అధికారులను ఆదేశించారు.
