విజయ్ దేవరకొండ తాజా సినిమా 'నోటా' రాజకీయ నేపథ్యంలో రూపుదిద్దుకుంటోంది. సినిమాను అక్టోబర్ 5న తెలుగు తమిళ భాషల్లో ఒకేసారి విడుదల చేయాలని భావించిన చిత్ర బృందానికి విడుదల కాకముందు నుంచే కష్టాలు ప్రారంభమయ్యాయి. దీనికి కారణం అందులో తమిళుల మనోభావాలు దెబ్బతినే సన్నివేశాలు ఉన్నాయట. ఆ సన్నివేశాలు చిత్రం నుంచి తొలగించాల్సిందేననీ, లేదంటే చిత్రం విడుదలను అడ్డుకుంటామని అన్నాడీఎంకెకు చెందినవారు అంటున్నారట.
ఇదే కాకుండా తెలుగు రాష్ట్రాల్లో జరిగిన రాజకీయ పరిణామాలకు సంబంధించిన సీన్లు కూడా ఉన్నాయని సమాచారం. కాబట్టి ఈ సినిమా విడుదలకు ఏదో ఒక అవాంతరం ఏర్పడే అవకాశం ఉంది. అయితే విజయ్ దేవరకొండ నటించిన అర్జున్ రెడ్డి, ద్వారక, గీత గోవిందం సినిమాలకు కూడా ఇలాగే అవాంతరాలు ఏర్పడగా అవి మూడూ మంచి విజయం సాధించాయి. కాబట్టి విజయ్‌కు ఇది కూడా కలిసొచ్చే అంశమే అంటున్నారు సినీ విశ్లేషకులు.
