వివాదాస్పద దర్శకుడు రామ్ గోపాల్ వర్మ రాజమౌళిపై ప్రశంసల జల్లు కురిపించాడు. బాహుబలి2 సినిమాకు వర్మ కొత్త నిర్వచనం ఇచ్చాడు. ప్రపంచకాలాన్ని క్రీస్తు పూర్వం, క్రీస్తు శకం అన్నట్లుగానే.. ఇప్పుడు భారతీయ సినిమాలను బాహుబలికి ముందు(బీబీ), బాహుబలికి తర్వాత(ఏబీ) అని పిలుస్తారంటూ ట్వీట్‌ చేశాడు. ఖాన్లు, రోషన్లు, చోప్రాల కన్నా రాజమౌళి గొప్పవాడని వర్మ రాసుకొచ్చాడు.
వజ్రం లాంటి రాజమౌళిని గుర్తించిన కరణ్‌జోహార్‌కు పాదాభివందనం చేయాలని, ఈ విషయంలో జోహార్‌తో సెల్యూట్‌ చేస్తున్నానంటూ రామ్ గోపాల్ వర్మ తెలిపాడు. బాహుబలి చిత్రాన్ని చూసిన బాలీవుడ్‌లోని ప్రతి సూపర్‌స్టార్‌, ప్రతి అత్యుత్తమ దర్శకుడూ వణికిపోతున్నాడని వర్మ రాసుకొచ్చాడు.
ఇకపోతే.. బాహుబలి2 కలెక్షన్ల సునామీ సృష్టిస్తోంది. అనూహ్య రీతిలో భారతీయ సినిమా చరిత్రలో కొత్త రికార్డులను నెలకొల్పింది. ఏపీ, తెలంగాణ, తమిళనాడు, కర్ణాటక, కేరళలతో పాటు ఉత్తరాదిన కలెక్షన్లు భారీగా పెరిగిపోతున్నాయి. ఇక అమెరికా, ఆస్ట్రేలియా, గల్ఫ్ దేశాల్లోనూ బాహుబలి ప్రభంజనం కొనసాగుతోంది.
