తమిళ హీరో విజయ్ నటించిన తాజా చిత్రం "సర్కార్". ఈ చిత్రం ఈనె ఆరో తేదీన విడుదల కావాల్సి ఉంది. ఆ రోజుతో పాటు 7, 8, 9 తేదీల్లో ప్రత్యేక షోలకు అనుమతి కోరుతూ ఆ రాష్ట్ర ప్రభుత్వానికి చిత్ర దర్శకనిర్మాతలు విజ్ఞప్తి చేశారు. కానీ, ముఖ్యమంత్రి ఎడప్పాడి కె.పళనిస్వామి సారథ్యంలోని అన్నాడీఎంకే సర్కారు ప్రత్యేక ప్రదర్శనలకు అనుమతి నిరాకరించింది. ఈ నాలుగు రోజుల పాటు కేవలం రెగ్యులర్ షోలతో పాటు ఒక్క ఆటను మాత్రం అదనంగా ప్రదర్శించేందుకు అనుమతి ఇచ్చింది.
కాగా, ఈ చిత్రం ప్రచార కార్యక్రమంలో భాగంగా, హీరో విజయ్ రాష్ట్ర ప్రభుత్వంపై పరోక్షంగా విమర్శలు గుప్పించారు. దీంతో ఈ చిత్రం స్పెషల్‌ షోలకు అనుమతి నిరాకరించింది. అయితే తమిళనాడు చలనచిత్ర పంపిణీదారుల సంఘం విజ్ఞప్తి మేరకు దీపావళి రోజుతోపాటు 7, 8, 9 తేదీలలో థియేటర్లలో ఒక్క స్పెషల్‌ షోకు మాత్రమే అనుమతి ఇచ్చింది. ఈ మేరకు ఆదివారం జీవో విడుదలైంది.
ఈ ప్రకారం ఒకరోజు కేవలం ఐదు షోల ప్రదర్శనకు మాత్రమే వీలవుతుంది. సాధారణంగా విజయ్ వంటి అగ్రహీరోల సినిమాలు విడుదలైతే తొలివారంలో ఆరు లేదా ఏడు షోలు వేస్తుంటారు. గతంలో ప్రభుత్వం కూడా అందుకు అనుమతిచ్చేది. కానీ, ఇప్పుడు 'సర్కార్'కు ఆ అవకాశం లేదు. 4 రెగ్యులర్ షోలు, ఒక స్పెషల్‌ షోతో కలిపి ఐదు షోలకు మాత్రమే వీలవుతుంది. అది కూడా నాలుగు రోజులు మాత్రమే. ఇది కలెక్షన్లపై ప్రభావం చూపుతుందని నిర్మాతలు ఆందోళన చెందుతున్నట్టు సమాచారం.
