ఇంద్ర‌జిత్ లోకేష్ ద‌ర్శ‌క‌త్వంలో తెర‌కెక్కుతున్న ఈ చిత్రంలో బాలీవుడ్ న‌టి రిచా చద్దా ప్రధాన పాత్రను పోషిస్తోంది. రీసెంట్‌గా ఈ సినిమా ఫస్ట్‌లుక్‌ పేరిట టైటిల్‌ లోగోను విడుదల చేశారు. ఇందులో 'నేను పోర్న్ స్టార్ కాదు' అని క్యాప్షన్ పెట్టారు. సినిమా సెట్‌లో శుక్రవారం తీసిన ఓ ఫొటోను పంచుకుంటూ.. ఇది తనకెంతో నచ్చిందని రిచా వ్యాఖ్యానించారు.
తెలుగు‌తో పాటు హిందీ, మలయాళం, తమిళ భాషల్లో విడుదల కానున్న ఈ చిత్రం గురించి రిచా చద్దా స్పందిస్తూ, షకీలా పాత్ర కోసం తనను సంప్రదించినప్పుడు తనకు భయమేసిందన్నారు. అయితే, షకీలాను కలిసి మాట్లాడిన తర్వాత ఈ సినిమా చేయగలను అనిపించిందని తెలిపారు. షకీలా తనకు అన్యాయం చేసినవారిని సైతం క్షమించారని, ఆమె వ్యక్తిత్వం తెలుసుకున్న తర్వాత ఈ సినిమాలో నటించాలని నిర్ణయించుకున్నట్టు చెప్పుకొచ్చింది.
