తమ వద్ద పనిచేసిన కారు డ్రైవర్‌ను హత్య చేసి ఇంటికి డోర్ డెలివరీ చేసిన వైకాపా నేతలకు కోర్టుల్లో బెయిల్ లంభించిందనీ, అక్రమ కేసు బనాయించి అరెస్టు చేసి జైల్లో బంధించిన టీడీపీ అధినేత చంద్రబాబు నాయుడుకు మాత్రం బెయిల్ రాకపోవడం విచారకరమని వైకాపా రెబెల్ ఎంపీ ఆర్. రఘురామకృష్ణంరాజు అన్నారు.
తమ పార్టీ అధినేత, ఏపీ ముఖ్యమంత్రి జగన్‌పై ఆయన మరోమారు తీవ్ర స్థాయిలో విమర్శలు గుప్పించారు. చంద్రబాబు అరెస్టు గురించి జగన్ ఉపయోగించిన భాషను చూసి ప్రజలు అసహ్యించుకుంటున్నారని అన్నారు. తాను లండన్‌ పర్యటనలో ఉన్నప్పుడు చంద్రబాబును పోలీసులు ఎత్తారు అంటూ జగన్ చేసిన వ్యాఖ్యలపై ప్రజల్లో నిరసన వ్యక్తమవుతోందన్నారు.
