జనసేన పార్టీ అధినేత పవన్ కళ్యాణ్‌ను ఉద్దేశించి వివాదాస్పద దర్శకుడు రాంగోపాల్ వర్మ తాజాగా చేసిన ఓ ట్వీట్ సంచలనం రేపుతోంది. ప్రస్తుతం ఏపీ శాసనసభ మాజీ స్పీకర్ నాదెండ్ల మనోహర్ జనసేన పార్టీలో చేరి, పవన్‌కు కుడిభుజంగా వ్యవహరిస్తున్నారు. ఈయన్ను ఉద్దేశించి ఆర్జీవీ ఓ ట్వీట్ చేశారు. దీంతో రాజకీయ వర్గాల్లో వర్మ మరోమారు హాట్‌టాపిక్ అయ్యారు.
తనకున్న అంతర్గత సమాచారం మేరకు ఇటీవల జనసేన పార్టీలో చేరిన మాజీ స్పీకర్ నాదెండ్ల మనోహర్.. పవన్ కళ్యాణ్‌కు వెన్నుపోటు పొడిచే ప్రమాదం ఉందని హెచ్చరించారు. గతంలో మనోహర్ తండ్రిగారైన నాదెండ్ల భాస్కర్ వెన్నుపోటు పొడిచారని గుర్తు చేశారు. అలాగే, నాదెండ్ల మనోహర్ కూడా అలా చేస్తారేమోనని తనకు ఆందోళనగా ఉందని ఆయన చెప్పారు.
ఈ విషయాన్ని పవన్‌కు ఒక అభిమానిగా చెబుతున్నానని.. పవన్ కల్యాణ్ ఫ్యాన్స్ కూడా అధినేతకు జాగ్రత్తలు సూచించాలని కోరారు. అయితే, వర్మ చేసిన ఈ కామెంట్స్‌ను పవన్ తేలిగ్గా తీసుకుంటున్నారు. తన దర్శకత్వంలో రూపొందుతున్న 'లక్ష్మీస్ ఎన్టీఆర్' అనే సినిమాలోని 'వెన్నుపోటు' పాటను శుక్రవారం వర్మ విడుదల చేస్తున్నారు. ఆ పాటకు, సినిమాకు పబ్లిసిటీ పెంచుకోవాలనే ఉద్దేశంతోనే ఇలా… ప్రజల్లో పేరున్న నాయకుడికి వెన్నుపోటు ప్రమాదం ఉందంటూ కామెంట్స్ చేస్తున్నారంటూ అభిప్రాయపడుతున్నారు.
