తిరుమల శ్రీవారి దర్సన టిక్కెట్ల సంఖ్యను పెంచింది తిరుమల తిరుపతి దేవస్థానం. అదనంగా మరో మూడు వేల టిక్కెట్లను ఆన్ లైన్లో అందిస్తోంది. ఇప్పటివరకు 6,750 టోకెన్లు మాత్రమే ఆన్ లైన్‌తో పాటు తిరుపతిలో భక్తులకు అందుబాటులో ఉంచింది. అయితే ఈ రోజు నుంచి 9,750 టిక్కెట్లను అందుబాటులోకి తీసుకొచ్చింది.
శుక్రవారం మాత్రం 10 స్లాట్లు మాత్రమే అందుబాటులో ఉంచనుంది. భక్తులు తిరుపతి బాలాజీ. ఎపి.జిఓవి.ఇన్ వెబ్ సైట్ ద్వారా ఆన్లైన్ టిక్కెట్లు పొందే అవకాశం ఉంది. లాక్ డౌన్ 5.0 సడలింపుల తరువాత ఈ నెల 10వ తేదీ నుంచి ఆఫ్ లైన్ లోను, ఆన్ లైన్లోను టిక్కెట్లను అందిస్తోంది టిటిడి.
అయితే విడతల వారీగా భక్తుల రద్దీని పెంచేందుకు నిర్ణయం తీసుకుంటున్నట్లు టిటిడి ఛైర్మన్ ప్రకటించిన విధంగానే తొమ్మిది రోజుల తరువాత మరో 3 వేల టిక్కెట్లను భక్తులకు అందుబాటులోకి తెచ్చింది టిటిడి. ఆన్లైన్లో ఇప్పటికే టిక్కెట్లను భక్తులు బుక్ చేసేసుకుంటున్నారు. స్వామివారిని దర్సనం చేసుకోవాలనుకునే వారు తొందరపడి ఆన్ లైన్ బుక్ చేసుకోవాల్సిందేనంటున్నారు టిటిడి అధికారులు.
