విజయవాడ నగరంలో పేదవర్గాలు అధికంగా నివసించే ఈ ప్రాంతాలపై ఓ ముఠా కన్నేసింది. 15, 16 ఏళ్ల వయస్సు ఉన్న బాలికలకు మాయమాటలతో వలేసింది. క్యాటరింగ్ పనులు ఇప్పిస్తామని నమ్మించి, తమతో తీసుకెళ్లింది. తూర్పుగోదావరి, విశాఖ జిల్లాలో జరిగే జాతరలు, ఉత్సవాల్లో వీరితో ఈ ముఠా అశ్లీల నృత్యాలు చేయించి, డబ్బులను తన జేబులో వేసుకుంటూ వస్తోంది. నృత్యాలు చేసేందుకు నిరాకరిస్తే మాత్రం వారికి నరకం చూపించేది.
ఇలా విజయవాడ - విశాఖ నగరాల మధ్య కొంతకాలంగా సాగిపోతున్న ఈ వ్యవహారాన్ని పోలీసులు రట్టుచేశారు. విశాఖ జిల్లా అనకాపల్లికి చెందిన ఆరుగురు సభ్యుల ముఠాను అదుపులోకి తీసుకున్నారు. వీరిపై ట్రాప్, కిడ్నాప్‌ సెక్షన్‌ల కింద పోలీసులు కేసు నమోదు చేశారు. వీరి గుప్పిట్లో ఉన్న 15 మంది బాలికలకు పోలీసులు విముక్తి కలిగించారు.
