భారత క్రికెట్ జట్టు ఐర్లాండ్ పర్యటనకు వెళ్లనుంది. వెస్టిండీస్ పర్యటనను ముగించుకుని అటు నుంచే ఐర్లాండ్‌కు వెళుతుంది. అక్కడ వారం రోజుల పాటు పర్యటిస్తుంది. ఆతిథ్య జట్టుతో మూడు మ్యాచ్‌లతో కూడిన టీ20 సిరీస్‌ను ఆడుతుంది. ఇందులోభాగంగా, ఇరు జట్ల మధ్య తొలి మ్యాచ్ ఆగస్టు 18న, రెండో మ్యాచ్ 20, మూడో మ్యాచ్ 23న జరుగుతుంది. ఈ మ్యాచ్‌లన్నీ మలాహిడే స్టేడియం వేదికగా జరుగుతాయి. భారత కాలమానం ప్రకారం మ్యాచ్‌లన్నీ మధ్యాహ్నం 3 గంటలకు ప్రారంభంకానున్నాయి.
అయితే, ఈ షెడ్యూల్‌పై బీసీసీఐ అధికారికంగా వెల్లడించలేదు. కానీ, ఐర్లాండ్ క్రికెట్ బోర్డు మాత్రం షెడ్యూల్‌ను రిలీజ్ చేసింది. కాగా, వెస్టిండీస్ పర్యటనలో భారత జట్టు తన చివరి మ్యాచ్‌ను ఆగస్టు 13వ తేదీన ఆడుతుంది. ఆ తర్వాత ఐర్లాండ్‌కు బయలుదేరి వెళుతుంది. ఈ సిరీస్‌కు సీనియర్లందరికీ విశ్రాంతినిచ్చి హార్దిక్ పాండ్యా కెప్టెన్సీలో యువ జట్టును పంపించే అవకాశాలు ఉన్నాయి. కాగా, గత 2022లో కూడా ఐర్లాండ్‌లో పర్యటించిన భారత క్రికెట్ జట్టు రెండు టీ20 మ్యాచ్‌లు ఆడిన విషయం తెల్సిందే.
