చెన్నై సూపర్ కింగ్స్ జట్టు సారథి ఎంఎస్ ధోనీ రిటైర్మెంట్‌పై గత కొన్ని రోజులుగా వివిధ రకాలైన వార్తలు వస్తూనే ఉన్నాయి. ఇదే అతడికి చివరి ఐపీఎల్‌ అంటూ ప్రతి సీజన్‌కు ముందు వార్తలు రావడం.. దానిపై పలువురు వివిధ రకాలుగా స్పందించడం చూస్తూనే ఉన్నాం. తాజాగా లక్నోతో బుధవారం చెన్నై సూపర్ కింగ్స్ జట్టు తలపడింది. ఈ సందర్భంగా ధోనీ తన రిటైర్మెంట్‌ వార్తలపై మరోసారి స్పందించాడు.
ఇటీవల ఈడెన్‌గార్డెన్స్‌లో కోల్‌కతాతో జరిగిన మ్యాచ్‌లో కూడా ధోనీ తన ఫేర్‌వెల్‌పై సరదా వ్యాఖ్యలు చేసిన విషయం తెలిసిందే. ఆ మ్యాచ్‌లో కోల్‌కతా సొంత మైదానం అయినప్పటికీ.. భారీగా అభిమానులు ఎంఎస్ ధోనీ నాయకత్వంలోని సీఎస్‌కేకు మద్దతుగా నిలిచారు. మ్యాచ్‌ అనంతరం ధోనీ ప్రేక్షకులకు ధన్యవాదాలు తెలిపాడు. తనకు ఫేర్‌వెల్‌ ఇచ్చేందుకు వీరంతా సీఎస్‌కే జెర్సీలో వచ్చినట్లుందని నవ్వుతూ అన్నాడు.
