వెస్టిండీస్ క్రికెట్ లెజండ్, రిటైర్మెంట్ ప్రకటించిన క్రికెట్ స్టార్ బ్రియాన్ లారాను మళ్లీ క్రీజులోకి దించేందుకు ఇంగ్లాండ్ దేశవాళీ క్రికెట్ జట్టు సర్రే సాయశక్తులా ప్రయత్నిస్తున్నట్లు వార్తలొస్తున్నాయి. బ్రియాన్ లారాను సర్రే జట్టు తరపున ట్వంటీ-20 మ్యాచ్‌ల్లో ఆడించేందుకు ఆ టీమ్ యాజమాన్యం సన్నాహాలు చేస్తున్నట్లు సమాచారం.
గత 2007వ సంవత్సరం కరేబియన్ గడ్డపై జరిగిన ప్రపంచకప్‌కు తర్వాత అంతర్జాతీయ క్రికెట్‌కు స్వస్తి పలికాడు. ఈ నేపథ్యంలో 41 ఏళ్ల బ్రియాన్ లారాను మళ్లీ క్రీజులోకి దింపాలని ఇంగ్లాండ్ కౌంటీ జట్టు సర్రే రంగం సిద్ధం చేస్తున్నట్లు వార్తలు వినిపిస్తున్నాయి.
ఈ విషయమై బీబీసీ వెబ్‌సైట్‌కు సర్రే జట్టు విడుదల చేసిన ప్రకటనలో.. ఇంగ్లాండ్ కౌంటీ జట్టులో ఆడేందుకుగాను బ్రియాన్ లారా వద్ద జట్టు నిర్వాహకులు చర్చలు జరుపుతున్నట్లు వెల్లడించింది.
మరోవైపు ఐపీఎల్ క్రికెట్‌లో పాల్గొంటారా? అనే ప్రశ్నకు బ్రియాన్ లారా సమాధానమిస్తూ.. ఐపీఎల్ క్రికెట్.. అంతర్జాతీయ క్రికెట్‌కు సవాలుగా పరిణమించిందని చెప్పాడు. అలాంటి ఛాలెంజింగ్ క్రీజులో ఆడటం సాధ్యం కాదని లారా వెల్లడించాడు. ఈ క్రమంలో కౌంటీ జట్టులో లారా ఆడుతాడా? లేదా? అనే అంశంపై సంశయం నెలకొంది.
ఇదిలా ఉంటే.. ఆస్ట్రేలియా ఆల్ రౌండర్ ఆండ్రూ సైమండ్స్‌తో ఒప్పందం కుదుర్చుకున్న సర్రే జట్టు త్వరలో బ్రియాన్ లారాను క్రీజులోకి దింపేందుకు ప్రయత్నిస్తోందని క్రీడా విశ్లేషకులు అంటున్నారు.
