చాలా మందికి రాత్రి వేళల్లో కంటినిండా నిద్రపోలేరు. దీంతో రోజంతా తీవ్రమైన శరీర బడలికతో అలసిపోయినట్టు కనిపిస్తారు. ఇలాంటి వారు కంటి నిండా నిద్రపోయేందుకు కారణాలను తెలుసుకుని వాటిని సరిచేసుకోవడమే కాకుండా, కొన్ని చిట్కాలను పాటిస్తే... హాయిగా నిద్రపోవచ్చు.
పడక గదిలోని మంచంపై బెడ్‌ అనుకూలంగా ఉందో లేదో చూసుకోవాలి. కొందరు టీవీ చూస్తూ అలానే నిద్రపోతారు. టీవీ నడుస్తూనే ఉంటుంది. దానివల్ల మధ్యలో మెలకువ వస్తుంది. అర్థరాత్రి మెలకువ వస్తే మళ్లీ నిద్రపట్టడానికి సమయం పడుతుంది. కాబట్టి టీవీ, లైట్స్‌ అన్నీ ఆఫ్‌ చేశాకే నిద్రకు ఉపక్రమించాలి.
నిద్రకు ఎటువంటి అంతరాయం లేకుండా చూసుకోవాలి. కుక్కల అరుపులు, వాహనాల శబ్దాలు బెడ్‌రూమ్‌లో వినిపిస్తుంటే నిద్రకు అంతరాయం కలగవచ్చు. మేడపైన ఉండే వారు చేస్తున్న శబ్దాలు, సీలింగ్‌ ఫ్యాన్‌ శబ్దం వల్ల కూడా నిద్రాభంగం కలగవచ్చు. ప్రశాంతమైన నిద్ర కావాలంటే అలాంటి శబ్దాలు దరిచేరకుండా చూసుకోవాలి.
