భారత్‌లోని జమ్మూకాశ్మీర్‌తో పాటు.. గుజరాత్ ప్రాంతాలను తమవిగా చూపించుకుంటూ పాకిస్థాన్ మంగళవారం సరికొత్త మ్యాప్‌ను విడుదల చేసింది. జమ్మూకాశ్మీర్‌కు ఉన్న ప్రత్యేక ప్రతిపత్తిని రద్దు చేస్తూ, భారత్ తీసుకున్న నిర్ణయంతో ఆ ప్రాంత వాసులంతా, తాము పాక్‌తోనే ఉన్నామని, ఇండియా తమపై దాష్టీకాలు చేస్తోందని మొరపెట్టుకున్నారని ఈ సందర్భంగా ఇమ్రాన్ కాన్ ఆరోపించారు. అందుకే, తాము కొత్త మ్యాప్‌ను విడుదల చేస్తున్నామన్నారు. కాశ్మీర్ వాసులంతా ఇక తమవారేనని వ్యాఖ్యానించింది. ఇకపై దేశంలోని అన్ని పాఠశాలల్లో ఇదే మ్యాప్ ఉంటుందని కూడా ఆయన అన్నారు.
దీనిపై కేంద్రం ఘాటుగా స్పందించింది. ఇదంతా ఇమ్రాన్ ఖాన్ రాజకీయ ప్రయోజనాల కోసం తీసుకున్న అసంబద్ధ నిర్ణయమని మండిపడింది. ఏ మాత్రమూ ప్రపంచ ఆమోదంలేని ఈ మ్యాప్‌ను ఎవరూ పట్టించుకోబోరని వ్యాఖ్యానిస్తూ, ఓ ప్రకటన విడుదల చేసింది.
ఇండియాలో భాగమైన గుజరాత్, మా కేంద్ర పాలిత ప్రాంతాలైన జమ్మూ కాశ్మీర్, లడఖ్‌లపై ఎవరూ ఆమోదించని వాదనలను పాక్ చేస్తోంది అని వ్యాఖ్యానించింది. సీమాంతర ఉగ్రవాదాన్ని ప్రోత్సహించాలన్న పాకిస్థాన్ కుతంత్రం దీని వెనుక ఉందని ఆరోపించింది.
