రోజువారీ జీవనం మరింత దుర్భరంగా మారడంతో శ్రీలంక ప్రజల్లో ఆగ్రహ జ్వాలలు మిన్నంటిపోయాయి. దీంతో శ్రీలంక అధినేతలంతా దిగివచ్చారు. ఉపద్రవాన్ని ముందే గుర్తించిన అధ్యక్షుడు గొటబాయ రాజపక్సే అధ్యక్ష భవనం వీడి పారిపోయారు. అలాగే, తన పదవికి రాజీనామా చేయనున్నట్టు ప్రధాని రణిల్ విక్రమ సింఘే ప్రకటించారు.
ఈ అంశాలన్నింటినీ క్షుణ్నంగా పరిశీలిస్తున్నట్లు భారత్ తాజాగా ఓ ప్రకటన చేసింది. శ్రీలంక ప్రజలకు అండగా ఉంటామని వెల్లడించింది. ప్రజాస్వామ్య మార్గాలు, రాజ్యాంగ విలువలు, పురోగతి కోసం ప్రయత్నిస్తున్న శ్రీలంక ప్రజలకు భారత్ అండగా నిలుస్తుందంటూ విదేశాంగ శాఖ ఓ ప్రకటనలో తెలిపింది.
కాగా, తీవ్ర సంక్షోభం కారణంగా ప్రభుత్వంపై శ్రీలంక ప్రజలు ఆగ్రహంతో ఉన్నారు. శనివారం అధ్యక్ష భవనంలోకి దూసుకెళ్లిన ఆందోళనకారులు ఇంకా అక్కడే ఉన్నారు. అక్కడే వంటావార్పూ చేసుకుంటున్నట్లు సామాజిక మాధ్యమాల్లో వైరల్‌ అవుతున్న వీడియోల ద్వారా తెలుస్తోంది.
