పాకిస్థాన్‌కు అమెరికా అందించే సాయం బిల్లుపై ఆ దేశ అధ్యక్షుడు బరాక్ ఒబామా సంతకం చేశారు. ఈ బిల్లు ప్రకారం పాకిస్థాన్‌కు అమెరికా 7.5 బిలియన్ డాలర్ల సాయం అందుతుంది. దీనికి చట్టబద్ధత కల్పించేందుకు ఉద్దేశించిన కెర్రీ-లూగార్‌ బిల్లుపై ఆయన గురువారం సంతకం చేశారు.
2009 పాకిస్థాన్‌తో భాగస్వామ్య విస్తరణ చట్టాన్నే కెరీ-లూగార్‌ బిల్లుగా వ్యవహరిస్తున్నారు. దీనిపై శ్వేతసౌధం అధికార ప్రతినిధి రాబర్ట్‌ గిబ్స్‌ మీడియాతో మాట్లాడుతూ ఒబామకు సమర్పించిన నాటి నుంచి నిర్ణీత గడువు పది రోజుల సమయం ముగిసేలోగా సంతకం చేయాల్సి వుంటుందని, ఆ ప్రకారం గురువారం సంతకం చేశారని చెప్పారు. ఈ బిల్లుపై పాకిస్థాన్ ఇటీవల వ్యక్తం చేసిన ఆందోళనలను పరిగణనలోకి తీసుకున్న అమెరికా కాంగ్రెస్‌ పాకిస్థాన్ సందేహాలను నివృత్తి చేసే దిశలో వివరణాత్మక ప్రకటనను కూడా జారీ చేసింది.
పాకిస్థాన్ సార్వభౌమత్వానికి, భద్రత ప్రయోజనాలకు కెర్రీ-లూగార్‌ బిల్లు ఎలాంటి అవరోధంగా నిలువదని స్పష్టం చేసింది. ఈ బిల్లు మేరకు వచ్చే ఐదేళ్ళలో ఏడాదికి 1.5 బిలియన్ డాలర్ల మేరకు అమెరికా ఆర్థిక సాయం చేస్తుంది. అయితే ఈ మొత్తాన్ని సైనిక కార్యకలాపాలకు కాకుండా, తీవ్రవాదుల అణిచివేతకు ఉపయోగించాల్సి ఉంటుంది.
