ఐపీఎల్ సీజన్ -11లో భాగంగా ఆదివారం వాంఖడే వేదికగా కోల్‌కతాతో జరిగిన మ్యాచ్‌లో 13 పరుగుల తేడాతో ముంబై ఇండియన్స్ జట్టు గ్రేట్ విక్టరీ సాధించింది. ముందుగా టాస్ ఓడి ముందుగా బ్యాటింగ్ చేసిన ముంబై 4 వికెట్ల నష్టానికి 181 పరుగులు చేసింది. అనంతరం లక్ష్య ఛేదనలో బ్యాటింగ్ చేసిన కోల్కతా 6 వికెట్లు కోల్పోయి 168 పరుగులు చేసి ఓడిపోయింది.
ముంబై ఇండియన్స్ జట్టు బ్యాట్స్‌మెన్ దూకుడుగా ఆడారు. కోల్కతా నైట్‌రైడర్స్ బౌలర్లను సమర్థవంతంగా ఎదుర్కొని నిర్ణీత ఓవర్లలో 4 వికెట్లకు 181 పరుగులు చేసింది. ఓపెనర్లు సూర్యకుమార్ యాదవ్ 39 బంతుల్లో 7 ఫోర్లు, 2 సిక్సర్ల సాయంతో 59 పరుగులు చేయగా, ఎవిన్ లెవిస్ 28 బంతుల్లో 5 ఫోర్లు, 2 సిక్సర్ల సహకారంతో 43 పరుగులు చేశాడు. దీంతో ముంబై పటిష్టస్థితిలో నిలిచింది. మ్యాచ్ చివర్లో బౌలర్ హార్దిక్ పాండ్యా తనదైన శైలిలో చెలరేగిపోయాడు. 20 బంతుల్లో సిక్స్, 4 ఫోర్ల సాయంతో 35 (నాటౌట్) పరుగులు చేయడంతో జట్టు స్కోరును 180 దాటించాడు. కోల్కతా బౌలర్లలో రసెల్, నరైన్ చెరో రెండు వికెట్లు పడగొట్టారు.
ఆ తర్వాత 181 పరుగుల విజయలక్ష్యంతో బరిలోకి దిగిన కోల్కతా జట్టు రాబిన్ ఉతప్ప 35 బంతుల్లో 6 ఫోర్లు, 3సిక్సర్ల సాయంతో 54 పరుగులు చేయగా, నితీశ్ రాణా 27 బంతుల్లో 3ఫోర్లు, ఓ సిక్స్‌తో 31, దినేశ్ కార్తీక్ 26 బంతుల్లో 5ఫోర్లు, సిక్స్ సాయంతో 36 (నాటౌట్) పోరాడినా ఫలితం లేకపోయింది. ముంబై బౌలర్లలో హార్దిక్ పాండ్య(2/19), మెక్లీనగన్(1/30) అద్భుతంగా బౌలింగ్ చేసి ప్రత్యర్థి జట్టును కట్టడి చేశారు. అటు బ్యాటింగ్ ఇటు బౌలింగ్‌లోనూ రాణించిన హార్దిక్ (4-0-19-2) కు 'మ్యాన్‌ ఆఫ్‌ ద మ్యాచ్' అవార్డు దక్కింది.
