ఈ నేపథ్యంలో ఎయిర్టెల్, వొడాఫోన్, బీఎస్ఎన్ఎల్‌ వంటి సంస్థలు జియోతో యుద్ధానికి కాలుదువ్వుతూనే వున్నాయి. ఈ నేపథ్యంలో ఎయిర్టెల్, వొడాఫోన్, బీఎస్‌ఎన్‌ఎల్‌లపై రిలయన్స్ జియో సంచలన ఆరోపణలు చేసింది. ఇంటర్‌కనెక్ట్‌ రాబడిని అక్రమంగా ఆర్జించేందుకు ఈ సంస్థలు ల్యాండ్లైన్ నెంబర్లను మొబైల్ నెంబర్లుగా చూపాయని రిలయన్స్ జియో ఆరోపించింది.
ఈ సంస్థలపై ట్రాయ్ భారీ జరిమానా విధించాలని కోరింది. అంతేగాకుండా టెలికాం నిబంధనలను ఉల్లంఘించి అక్రమాలకు పాల్పడిన ఎయిర్టెల్, వొడాఫోన్, ప్రభుత్వ రంగ బీఎస్‌ఎన్‌ఎల్‌పై భారీ జరిమానా విధించాలని ట్రాయ్ చీఫ్‌ ఆర్‌ఎస్‌ శర్మకు ఈనెల 14న రాసిన లేఖలో జియో విజ్ఞప్తి చేసింది.
ఈ స్కామ్‌ వెలుగుచూసిన క్రమంలో ఆయా కంపెనీలకు తాము చెల్లించిన టెర్మినేషన్‌ ఛార్జీలను రిఫండ్‌ చేసేలా చర్యలు చేపట్టాలని ట్రాయ్‌ను కోరింది. కాగా జియో ఆరోపణలను ఎయిర్టెల్ తోసిపుచ్చింది. ఇంటర్‌కనెక్ట్‌ యూసేజ్‌ చార్జ్‌పై సంప్రదింపుల ప్రక్రియ కొనసాగుతున్న క్రమంలో ట్రాయ్‌ను తప్పుదారిపట్టించేందుకు జియో ప్రయత్నిస్తోందని ఫైర్ అయ్యింది.
