మహారాష్ట్రలో దారుణం జరిగింది. కట్టుకున్న భర్త కన్నెదుటే భార్యపై గ్యాంగ్ రేప్ జరిగింది. భర్తను కాళ్లూ చేతులు కట్టిసి కారులో పడేసి.. ఆ తర్వాత ఆయన ముందే 20 యేళ్ళ భార్యపై పలువురు కామాంధులు సామూహిక అత్యాచారానికి పాల్పడ్డారు. బాధితురాలు 8 నెలల గర్భిణి అయినప్పటికీ నిందితులు కరుణించలేదు. మహారాష్ట్రలోని సాంగ్లీ జిల్లాలో ఈ ఘటన జరిగింది. ఈ వివరాలను పరిశీలిస్తే...
పోలీసులు వెల్లడించిన వివరాల మేరకు... సతారా జిల్లాలో ఈ జంట ఓ హోటల్‌ను నిర్వహిస్తోంది. ఈ హోటల్‌లో పనిచేసేందుకు ఇధ్దరు అవసరమయ్యారు. ఇంతలో ముకుంద్ మానే అనే నిందితుడు వీరిని సంప్రదించాడు. ఇక్కడి తుర్చిఫాటా ప్రాంతంలో ఓ జంట పనిచేసేందుకు సిద్ధంగా ఉందనీ, రూ.20 వేలు అడ్వాన్స్ తీసుకుని రావాలని చెప్పాడు.
దీంతో భార్యతో కలసి హోటల్ యజమాని తుర్చిఫాటాకు వెళ్లాడు. అక్కడే మరో 8 మంది నిందితులతో కలసి ముకుంద్ అతనిపై కర్రలు, రాడ్లతో దాడిచేసి తీవ్రంగా గాయపర్చాడు. ఆ తర్వాత అతడిని కాళ్లూ చేతులు కట్టేసి కారులో పడేశారు. పిమ్మట ఆయన భార్యపై సామూహిక అత్యాచారానికి పాల్పడ్డారు. అనంతరం వీరివద్ద ఉన్న నగదు, బంగారం దోచుకుని పరారయ్యారు. అక్కడ నుంచి తప్పించుకుని వచ్చిన ఆ దంపతులు పోలీసులకు ఫిర్యాదు చేశారు. కేసు నమోదు చేసిన పోలీసులు నిందితుల కోసం గాలిస్తున్నారు.
