శశికళ తన తడాఖా ఏమిటో తమిళనాడు నుంచి బెంగళూరు వరకూ తన కాన్వాయ్ తో చెప్పేసింది. ఈ కాన్వాయ్ చూసిన జనం ముక్కున వేలేసుకుంటున్నారు. గతంలో ముఖ్యమంత్రిగా వున్న జయలలిత సైతం ఇంత హడావిడి చేయలేదనీ, జైలు శిక్ష అనుభవించేందుకు వెళుతే ఇంత పెద్దఎత్తున ఊరేగింపుగా శశికళ రావడంపై న్యాయమూర్తి ఒకింత ఆగ్రహానికి గురైనట్లు సమాచారం వస్తోంది.
కాగా జైలులో లొంగిపోయేందుకు వెళ్లిన శశికళ గొంతెమ్మ కోర్కెలు కొన్నింటిని న్యాయమూర్తి ముందు వుంచింది. తనను ప్రత్యేక ఖైదీగా చూడాలనీ, తనకు విడిగా అన్ని వసతులు వున్న గదిని కేటాయించాలనీ, దానికి ఏసీ, ఒక టీవీ, వేడివేడి నీరు, మెత్తని బెడ్ తదితరాలన్నీ కావాలని ఆమె విజ్ఞప్తి చేశారు. ఐతే శశికళ విజ్ఞప్తిని న్యాయమూర్తి తోసిపుచ్చారు. ఆమెను ఓ సాధారణ ఖైదీలా పరిగణించాలనీ, ఆమెతో పాటు మిగిలినవారిని కూడా అలాగే చూడాలని ఆదేశించారు.
దీనితో ఆమెకు ఖైదీ నెం. 10711 నెంబరును కేటాయించి, తెల్లచీర ఒకటి ఇచ్చి సాధారణ ఖైదీలుండే కారాగారానికి తరలించారు. ఆమెతో పాటు మరో ఇద్దరు ఖైదీలుంటారు. వీరంతా ఒకే గదిలోనే వుంటారు. గతంలో జయలలిత ముఖ్యమంత్రిగా వున్నారు కనుక ఆమెకు ప్రత్యేక సదుపాయాలు కల్పించారు కానీ శశికళ విషయంలో అలాంటివేవీ నియమించే అవకాశం లేదని న్యాయమూర్తి తేల్చి చెప్పారు.
