సాధారణంగా దేశంలో నడిచే రైళ్లు ఆలస్యంగా నడుస్తాయనే ప్రచారం ఉంది. "నేను ఎక్కాల్సిన రైలు జీవిత కాలం లేటు" అని ప్రముఖ సినీ కవి ఆరుద్ర అన్నారు కూడా. అనేక సందర్భాల్లో భారతీయ రైళ్ళ రాకపోకలను చూస్తే ఇది నిజమేనని నిరూపితమైన సంఘటనలు అనేక ఉన్నాయి. అయితే, ఇపుడు పరిస్థితులు మారిపోయాయి. నిర్ణీత సమయం లేదా దానికంటే ముందుగానే రైళ్లు స్టేషన్లకు వచ్చి ఆగుతున్నాయి.
తాజాగా మధ్యప్రదేశ్ రాష్ట్రంలోని రాట్లాం రైల్వే స్టేషన్‌లో బుధవారం రాత్రి ఓ రైలు నిర్ణీత సమయానికంటే 20 నిమిషాలు ముందుగా వచ్చి ఆగింది. బాంద్రా - హరిద్వార్ రైలు రాత్రి 10.35 గంటలకు స్టేషన్‌కు వచ్చి 10 నిమిషాలు ఆగుతుంది. కానీ, బుధవారం రాత్రి ఈ రైలు ఏకంగా 20 నిమిషాలు ముందుగానే స్టేషన్‌కు వచ్చి ఆగింది.
