తాజాగా వెలుగులోకి వచ్చిన ఈ వివరాలను పరిశీలిస్తే, ఈ నెల 18 నుంచి 22 వరకు న్యూ ఢిల్లీలో ఆసియన్‌ ట్రాక్ సైక్లింగ్ ఛాంపియన్‌షిప్ నిర్వహించనున్నారు. దీనికి సన్నాహకంగా స్లొవేనియాలో ప్రిపరేషన్ క్యాంపు నిర్వహించారు. అక్కడ కోచ్‌ తనతో అసభ్యకరంగా ప్రవర్తించినట్లు మహిళా సైక్లిస్టు ఫిర్యాదులో పేర్కొంది.
దీంతో సాయ్‌ సూచనల మేరకు సైక్లింగ్ ఫెడరేషన్ ఆఫ్ ఇండియా (సీఎఫ్ఐ) బుధవారం భారత బృందాన్ని స్లోవేనియా నుంచి వెనక్కి రప్పించింది. కోచ్‌పై ఆరోపణలు చేసిన మహిళా సైక్లిస్ట్ జూన్ 3న భారత్‌కు చేరుకుంది. ఈ అంశంపై విచారణ జరిపేందుకు సాయ్‌, సైక్లిస్ట్ ఫెడరేషన్ ఆఫ్ ఇండియా (సీఎఫ్ఐ) రెండూ వేర్వేరు కమిటీలను ఏర్పాటు చేశాయి.
