హైదరాబాద్, రాచకొండ కమిషనరేట్ పరిధిలోని బాలాపూర్‌లో ఆత్మహత్యకు ప్రయత్నించిన ఓ యువతిని పోలీసులు సకాలంలో స్పందించి ప్రాణాలు రక్షించారు. బాలాపూర్ గ్రామంలోని ఓ యువతి ఆత్మహత్యాయత్నం చేసిందంటూ గురువారం ఉదయం 9.45 గంటలకు బాలాపూర్ పోలీసులకు డయల్ 100 ద్వారా ఓ ఫోన్ కాల్ వచ్చింది. ఆ సమయంలో బాలాపూర్ పీఎస్‌లో విధుల్లో ఉన్న రాజు రెడ్డి, ఎస్ తరుణ్ అనే కానిస్టేబుళ్లు 5 నిమిషాల వ్యవధిలోనే సంఘటనా స్థలానికి చేరుకున్నారు.
అక్కడికి వెళ్ళి చూసిన ఆ ఇద్దరు కానిస్టేబుళ్లు ఓ యువతి గది లోపలి నుంచి గడియపెట్టుకున్నట్టు గుర్తించారు. ఇంకేమాత్రం ఆలస్యం చేయకుండా తలుపులు బద్దలు కొట్టి ఆ యువతిని కాపాడారు. ఆమె ఆత్మహత్యాయత్నాన్ని విరమింపజేశారు. ఆమెకు, ఆమె కుటుంబ సభ్యులకు కౌన్సెలింగ్ ఇచ్చారు. దీనికి సంబంధించిన వీడియోను రాచకొండ పోలీస్ సోషల్ మీడియా ఖాతాలో షేర్ చేశారు.
ఈ ఇద్దరు కానిస్టేబుళ్లు సత్వర స్పందన వారి అంకితభావం ఓ విలువైన ప్రాణాన్ని నిలబెట్టిందంని ఆ పోస్టులో కొనియాడారు. ఎవరైనా కష్టాల్లో ఉన్నపుడు ఆత్మహత్య ఆలోచనలు చేయకుండా తమకు ఇష్టమైన వారితో మాట్లాడి, వారి సాయం తీసుకోవాలని సూచించారు. అత్యవసర సమయాల్లో డయల్ 100కి కాల్ చేయొచ్చని, 87126 62111 అనే నంబరు ద్వారా వాట్సాప్‌లో సంప్రదించవచ్చని ఆ పోస్టులో సూచించారు.
