ఆమెకి 22 ఏళ్లు, అతడికి 18 ఏళ్లు. కానీ వయసుతో సంబంధం లేకుండా ప్రేమలో మునిగారు. ఐతే విషయం పెద్దలకు తెలియడంతో ససేమిరా అన్నారు. నాలుగేళ్ల పెద్దదైన యువతితో పెళ్లికి నో చెప్పడంతో ఇరువురూ కలిసి నల్లమల అడవికి వెళ్లి ఓ చెట్టుకు ఉరి వేసుకుని ప్రాణాలు తీసుకున్నారు.
పోలీసులు తెలిపిన వివరాలు ఇలా వున్నాయి. నాగర్ కర్నూలు జిల్లా లోని లింగాల మండలం లోని శ్రీరంగాపూర్ గ్రామానికి చెందిన 18 ఏళ్ల సలేశ్వరం ఇంటర్ చదివి హైదరాబాదులో ఓ ప్రైవేట్ కంపెనీలో పనిచేస్తున్నాడు. ఇతడికి అదే గ్రామానికి చెందిన 22 ఏళ్ల రాధతో పరిచయం ఏర్పడింది. అది కాస్తా ప్రేమగా మారింది. ఈ విషయం పెద్దలకి తెలియడంతో వారు అంగీకరించలేదు.
రాధకు మరో సంబంధాన్ని చూసి నిశ్చితార్థం చేసారు. కొద్దిరోజుల్లో పెళ్లి జరుగనుంది. ఈ విషయం తెలుసుకున్న సలేశ్వరం హైదరాబాదు నుంచి వచ్చి రాధను తీసుకుని అజ్ఞాతంలోకి వెళ్లిపోయాడు. వారి కోసం కుటుంబ సభ్యులు గాలిస్తుండగా నల్లమల అడవిలో ఓ చెట్టుకి యువతీయువకుల శవాలు వేలాడుతున్నట్లు గొర్రెల కాపరులు గుర్తించారు. విషయాన్ని గ్రామస్తులకు తెలియజేశారు. పోలీసులు సమాచారం అందుకుని కేసు నమోదు చేసుకుని దర్యాప్తు చేస్తున్నారు.
