తెలంగాణలో కలకలం రేపిన పెద్దపల్లి జిల్లాలో జరిగిన న్యాయవాద దంపతుల హత్య కేసులో రోజుకో ట్విస్ట్ వెలుగులోకి వస్తోంది. హత్యల వెనుక రాజకీయ కారణాలు ఉన్నాయన్న ఆరోపణలు వస్తుండగా.. అందుకు బలాన్నిచ్చే అధారాలు ఒక్కొక్కటిగా బయటపడుతున్నాయి. హత్యకు గురైన న్యాయవాదులు గతంలో వేసిన కేసులు, మంథని ఏరియాలో జరిగిన పరిణామాలకు సంబంధించి సంచలన అంశాలు తెరపైకి వస్తున్నాయి.
'' మంచిర్యాల జిల్లా నెన్నల మండలంలోని 18 గ్రామాల్లో 1973 సీలింగ్ యాక్ట్ ప్రకారం పట్టాలు కలిగి ఉన్న లబ్ధిదారుల పేర్ల నుండి వేరే ఇతర వ్యక్తుల పేర్లపైకి అక్రమ మార్గంలో సుమారు 1200 ఎకరాలు, ప్రస్తుతం మార్కెట్ విలువ రూ. 6 వేల కోట్ల విలువైన భూమిని బదలాయించి చట్ట విరుద్దంగా సీలింగ్ పట్టా మార్పిడి చేసిన అవినీతి అధికారులపై చర్యల కోసం హైకోర్టులో ప్రజా ప్రయోజనాల వాజ్యం (పిల్) దాఖలు చేయనున్న నెన్నెల మండలం ఇందూరు గ్రామానికి చెందిన సామాజిక కార్యకర్త ఇందూరి రాంమోహన్''
రూ. 6 వేల కోట్ల విలువైన భూ దందా స్కాం గురించి వెలుగులోకి వస్తే పెద్ద తలకాయలు బయటపడతాయన్న ఆందోళనతో.. హంతకులతో ఎవరైనా చేతులు కలిపి ఉంటారా అన్న చర్చ ప్రస్తుతం జిల్లాలో కొనసాగుతోంది. వామనరావు పోస్టులతో పాటు మంచిర్యాల జిల్లా నెన్నల మండలంలోని 18 గ్రామాల సీలింగ్ యాక్ట్ భూములపైనా సమగ్ర విచారణ జరపాలనే డిమాండ్ వస్తోంది.
