రాంగోపాల్ వర్మ వివాదాలకు పెట్టింది పేరు. సినిమాలు కూడా అంతే కేవలం వివాదాలు ఉన్నవి మాత్రమే ఎంచుకుని సినిమాలుగా తీస్తారు. ఎక్కడ ఏమి సంచలనం అయినా దానిని సినిమాగా తీస్తూ అందరిని ఆశ్చర్యపరుస్తారు. మొన్న నయీం ఎన్‌కౌంటర్ కాగానే అయన పేరుపై మూడు భాగాలలో సినిమా తీస్తా అని ప్రకటించారు. అంతకుముందు తీసిన బ్రూస్ లీ సినిమా ఏమైందో ఎవ్వరికి తెలియదు. నిన్న ''వంగవీటి'' సినిమా తీశారు.
ఇప్పుడు తాజాగా మరో వివాదానికి తెరతీశారు. వర్మ తాజా చిత్రం "సర్కార్ 3''. సర్కార్ రాజ్ సినిమాలతో ఇప్పటికే ఘన విజయం సాధించిన వర్మ ఆ వరుసలో తీస్తున్న మూడో చిత్రమిది. అయితే, సర్కార్‌కు సీక్వెల్ నిర్మించే హక్కు వర్మకు లేదంటూ నరేంద్ర హిరావత్ అనే నిర్మాత నోటీసులు పంపించాడు.
సర్కార్ సినిమాకు చెందిన హక్కులన్నీ తనవేనని, సీక్వెల్ తీయాలన్నా, రీమేక్ చేయాలన్నా తన అనుమతి తీసుకోవాల్సిందే అని నోటీసులో వెల్లడించాడు. తనను సంప్రదించకుండానే రాంగోపాల్ వర్మ సర్కార్ 3 సినిమా స్టార్ట్ చేశాడని, వెంటనే తనతో మాట్లాడకపోతే వర్మపై చట్టపరమైన చర్యలు తీసుకోవాల్సి ఉంటుందని హెచ్చరించాడు. అయితే ఇలాంటి వివాదాలు వర్మకు సర్వసాధారణం. మరి ఈ హెచ్చరికలకు వర్మ స్పందిస్తాడా.. లేదా తనదైనశైలిలో డీల్ చేస్తాడాని వేచిచూడాల్సిందే.
