చాలా తక్కువకాలంలోనే ఎంతో క్రేజ్ సంపాదించుకున్న హీరోలలో విజయ్ దేవరకొండ పేరు ముందు వరుసలో ఉంటుంది. 'అర్జున్ రెడ్డి' సినిమాతో తెలుగునాట మాత్రమేకాకుండా కర్ణాటక, చెన్నైలో కూడా విజయ్ దేవరకొండకు అభిమానులు ఉన్నారు. బయట జరిగే పలు ఈవెంట్‌లలో కూడా భిన్నమైన యాటిట్యూడ్, చక్కని ప్రసంగాలతో ఎంతో ఆకట్టుకుంటాడు ఈ నటుడు. తాజాగా విజయ్ అమెజాన్‌పై కేసు వేసి వార్తల్లో నిలిచాడు.
విజయ్ దేవరకొండ తనకు సంబంధించి జరిగే ప్రతి ఈవెంట్‌లోనూ తన అభిమానులను రౌడీ బాయ్స్ అండ్ గర్ల్స్ అని పిలుస్తుంటారు. అభిమానులు కూడా విజయ్‌ని రౌడీ అని ముద్దుగా పిలుస్తుంటారు. ఇక 'రౌడీ' అనే పదం విజయ దేవరకొండ బ్రాండ్‌గా ముద్రపడిపోయింది. ఈ క్రేజ్‌ను క్యాష్ చేసుకోవాలనే ఆలోచనతో రౌడీ వేర్ ప్రైవేట్ లిమిటెడ్ పేరుతో బెంగుళూరులో స్థానికంగా పెద్ద స్థాయిలో దుస్తుల వ్యాపారం మొదలైంది.
ఎంత పాపులర్ అయిందంటే దీని విక్రయాలు అమెజాన్‌లో కూడా సాగుతున్నాయి. ఈ విషయం విజయ్ దృష్టికి రావడంతో బెంగుళూరు కోర్టులో పిటిషన్ దాఖలు చేశాడు. విచారణ జరిపిన కోర్టు తాజాగా అమెజాన్ సంస్థకు నోటీసులు జారీ చేసి, ఆ బ్రాండ్ దుస్తుల విక్రయాలను ఆపివేయాలని ఆదేశించింది. ఈ విషయంలో విజయ్‌కు పలు సంస్థల నుండి మద్దతు అందుతోందట.
