ఇండస్ట్రీకి తలలోనాలుకగా వున్న దర్శకరత్న దాసరి నారాయణరావు ప్రస్తుతం అనారోగ్యంతో సికింద్రాబాద్‌లోని కిమ్స్‌ ఆసుపత్రిలో చికిత్స పొందుతున్న విషయం తెలిసిందే. దాదాపు చాలారోజులపాటు ఆయన అక్కడే వున్నారు. శ్వాసకు సంబంధించిన, మోచేతికి సంబంధించిన కొన్ని చికిత్సలు ఆయనకు చేశారని సన్నిహితులు తెలియజేస్తున్నారు. సినిమాటోగ్రఫీ మంత్రి తలసాని శ్రీనివాసయాదవ్‌ తరచూ ఆయన ఆరోగ్యం గురించి వాకబు చేస్తూనే వున్నారు.
ముఖ్యమంత్రి కేసీఆర్ కూడా మంచి చికిత్స చేయాలని ఆసుపత్రి వర్గాలను ఆదేశించారు కూడా. కాగా, గత నెలలో ఆసుపత్రిలో చేరిన ఆయన ఇంకా డిశ్చార్జ్‌ కాకపోవడంతో ఆయన శిష్యులు ఆందోళన చెందుతున్నారు. ఇప్పటికే పది శస్త్రచికిత్సలు జరిగాయని వార్తలు వస్తున్నాయి. అటువంటిది ఏమీ లేదని డాక్టర్లు చెబుతున్నా.. పలువురు ఆయన కోలుకోవాలని పూజలు చేస్తున్నారు.
