రూ. 50 కోట్ల బడ్జెట్టుతో తెరకెక్కిన ఫ్యామిలీ స్టార్ చిత్రంలో విజయ్ దేవరకొండ హీరో. పరుశురామ్ దర్శకత్వం వహించిన ఈ చిత్రంలో మృణాల్ ఠాకూర్ హీరోయిన్. ఈ చిత్రం విడుదలైన మొదటి రోజు బాక్సాఫీస్ వద్ద భారీ కలెక్షన్లు రాబట్టింది కానీ ఆ తర్వాత క్రమంగా వసూళ్లు వేగంలో తగ్గుదల కనిపించింది. సినిమాపై కొందరు పనిగట్టుకుని వ్యతిరేక ప్రచారం చేసారంటూ హీరో విజయ్ దేవరకొండ ఆగ్రహం వ్యక్తం చేసారు. సోషల్ మీడియాలో తమ చిత్రంపై ఎవరైతే నెగటివ్ ప్రచారం చేసారో వారిపై ఫిర్యాదు చేసినట్లు చెప్పారు.
ఇదిలావుంటే ఈ చిత్రానికి నిర్మాత దిల్ రాజు. ఆయన చిత్ర నిర్మాణంలో ఎక్కడ కూడా కాంప్రమైజ్ కారు. కనుక చిత్రానికి రూ. 50 కోట్లు ఖర్చుపెట్టినట్లు సినీ వర్గాల సమాచారం. ఐతే ఇప్పటివరకూ ఫ్యామిలీ స్టార్ కేవలం రూ. 28 కోట్లను మాత్రమే వసూలు చేసింది. పెట్టింది రావాలంటే మరో 22 కోట్లు లాగాలి. పరిస్థితి చూస్తుంటే అలా లేదంటూ కొంతమంది విశ్లేషకులు అభిప్రాయపడుతున్నారు. దీనికి కారణం సినిమా విడుదలైన మొదటి వారంలోనే అనేక స్క్రీన్‌ల నుండి ఈ చిత్రాన్ని తొలగించేసారట.
