సీనియర్ నటి సావిత్రి జీవిత నేపథ్యంలో తెర‌కెక్కిన చిత్రం 'మహానటి'. మే 9న విడుద‌లైన ఈ చిత్రం కేవ‌లం తెలుగు ప్రేక్ష‌కుల‌నే కాదు దేశవ్యాప్తంగా ఉన్న సినీ ల‌వ‌ర్స్ మ‌న‌సులు గెలుచుకుంది. తెలుగు, త‌మిళ భాష‌ల‌లో విడుద‌లైన ఈ చిత్రాన్ని దేశవ్యాప్తంగా రిలీజ్ చేసేందుకు స‌న్నాహాలు చేస్తున్నార‌ట మూవీ మేక‌ర్స్.
తాజాగా 'రావోయి మా ఇంటికి' అనే సాంగ్‌కి సంబంధించిన వీడియోని విడుద‌ల చేశారు. ఇందులో కీర్తి సురేష్ అభిన‌యం అచ్చం సావిత్రిలానే ఉండ‌టంతో ఆమెపై అభిమానులు ప్ర‌శంస‌లు కురిపిస్తున్నారు. సినిమా నుండి తొలగించిన సీన్స్ అంటూ విడుద‌లైన కొన్ని క్లిప్స్ సినీ ప్రేక్ష‌కుల‌ని ఎంత‌గానో అల‌రిస్తున్నాయి. మంచి సీన్ల‌ని ఎందుకు తొల‌గించారంటూ కొంద‌రు త‌మ అభిప్రాయం వ్య‌క్తం చేస్తున్నారు. నాగ్ అశ్విన్ ద‌ర్శ‌క‌త్వంలో తెర‌కెక్కిన మహానటి చిత్రం వైజ‌యంతి మూవీస్ బేన‌ర్‌పై ప్రియాంక దత్, స్వ‌ప్నా దత్ నిర్మాణంలో రూపొందింది.
