మణికర్ణిక ప్రాజెక్టు నుంచి ప్రస్తుతం ఒక్కొక్కరు తప్పుకుంటూ వస్తున్నారు. దర్శకుడు క్రిష్ పూర్తి చేసిన ఈ ప్రాజెక్ట్‌లో చిన్న చిన్న పనులు మిగిలిపోవడం, దర్శకుడు క్రిష్ నందమూరి బాలకృష్ణ నటిస్తున్న ఎన్టీఆర్ బయోపిక్‌కు దర్శకత్వ బాధ్యతలు స్వీకరించడంతో ఈ ప్రాజెక్టు నుంచి తప్పుకున్న సంగతి తెలిసిందే. దీంతో ఈ సినిమా దర్శకత్వ బాధ్యతలను హీరోయిన్ కంగనా రనౌత్ చేతుల్లోకి తీసుకుంది.
ఈ ప్రాజెక్ట్‌ను తన చేతుల్లోకి తీసుకున్నాక.. ఒక్కొక్కరినీ ఈ ప్రాజెక్టు నుంచి తప్పించుకుంటూ వస్తోంది. ఇప్పటికే ఈ ప్రాజెక్ట్‌లో కీలకమైన పాత్రను పోషిస్తున్న సోనుసూద్ సినిమా నుంచి తప్పుకున్నాడు. సోనూసూద్ పక్కకు తప్పుకోవడంతో ప్రాజెక్ట్ అయోమయంలో పడిపోయింది. కంగనా మాత్రం ఎవరు ఉన్నా లేకున్నా ప్రాజెక్ట్ ఆగదని.. అనుకున్న సమయానికి సిద్ధం అవుతుందనే ధీమాను వ్యక్తం చేస్తోంది.
తాజాగా ఈ ప్రాజెక్ట్ నుండి నిర్మాత సంజయ్ కుట్టి కూడా తప్పుకున్నట్లు సమాచారం. దీంతో ఇప్పుడు కొత్త నిర్మాతలు ఈ సినిమాను టేకప్ చేస్తున్నట్లు చెప్పుకుంటున్నారు. రూ.70 కోట్లు అనుకున్న బడ్జెట్ కాస్త ఇప్పుడు రూ.100 కోట్లకు చేరుకోవడం, విడుదల కూడా వాయిదా పడే అవకాశాలు ఉండడంతో నిర్మాత ఈ ప్రాజెక్ట్ నుండి తప్పుకున్నారని టాక్.
