హనీమూన్ గురించి ఆలోచించట్లేదు.. పెళ్లికి తర్వాత హీరోయిన్లకు కెరీర్ ఉండదా?: సమంత

రాజుగారి గది-2 సినిమాలోని తన పాత్రకు లభిస్తున్న స్పందన చూస్తుంటే సంతోషంగా వుందని అక్కినేని వారింటి కోడలు సమంత వెల్లడించింది. పెళ్లి తర్వాత హీరోయిన్లకు కెరీర్ ఉండదనే అపోహలకు తాను చెక్ పెట్టాలనుకుంటున్నానని ఓ ఇంటర్వ్యూలో సమంత తెలిపింది. అందుకే ప్రస్తుతానికి హనీమూన్ గురించి ఆలోచించట్లేదని... పెళ్లికి తర్వాత తన దృష్టంతా సావిత్రి సినిమాపైనే వుందని స్పష్టం చేసింది. 

''ఏమాయ చేశావే'' సినిమాలోనూ చైతూ, తాను రెండుసార్లు, రెండు పద్ధతుల్లో వివాహం చేసుకున్నామని, ఇప్పుడు నిజ జీవితంలోనూ అదే జరిగిందని ఉద్వేగంగా చెప్పింది. గోవా తమకు సెంటిమెంట్ ప్లేస్ కావడంతోనే అక్కడే వివాహం చేసుకున్నట్లు వెల్లడించింది. రాజగారి గది-2 సినిమాలోని తన పాత్రకు లభిస్తున్న స్పందన చూస్తుంటే ఎంతో సంతోషంగా వుందని సమంత తెలిపింది. అక్టోబర్ తనకు లక్కీ నెలగా మారిందని చెప్పుకొచ్చింది.

నాగ చైతన్యకు హారర్ సినిమాలు చూడడం అస్సలు ఇష్టం లేకున్నా తనతో కలిసి రాజుగారి గది-2 సినిమా చూశాడని చెప్పింది. తన నుంచి అక్కినేని కుటుంబం ఏమీ ఆశించడం లేదని, కానీ వారు తనకిస్తున్న గౌరవాన్ని కాపాడుకుంటానని తెలిపింది. పెళ్లయ్యాక సినిమాలు మానేయాలన్న ఆలోచన తనకు రాలేదని అన్నారు. తనకు సినిమాలు, వ్యక్తిగత జీవితం రెండూ ముఖ్యమేనని సమంత తేల్చి చెప్పింది.