తమిళ సినీ నటి కస్తూరి శంకర్ మరోమారు నోటికి పని చెప్పారు. ఈ దఫా అధికార డీఎంకేను లక్ష్యంగా చేసుకుని విమర్శలు గుప్పించారు. గత ఆరు దశాబ్దాలుగా ఉదయించే సూర్యుడుకి రెండాకుల గుర్తే శత్రువుగా ఉందని ఆమె ఆరోపించారు. అలాగే, కొత్తగా పార్టీ పెట్టిన హీరో విజయ్ ఎలాంటి ఎన్నికల గుర్తు తీసుకుంటారో తనకు ఎలా తెలుసని ఆమ మీడియాకు ఎదురు ప్రశ్నించారు.
ఇటీవల తెలుగువారిపై వివాదాస్పద వ్యాఖ్యలతో సినీనటి కస్తూరి జైలుకు వెళ్లొచ్చిన విషయం తెలిసిందే. తాజాగా ఆమె తమిళనాడు రాజకీయాలపై కీలక వ్యాఖ్యలు చేశారు. రాష్ట్రంలోని కీలక పార్టీలైన డీఎంకే, అన్నాడీఎంకేలను ఉద్దేశిస్తూ రాష్ట్రంలో ఉదయించే సూర్యుడికి శత్రువుగా రెండాకుల గుర్తే 60 ఏళ్లుగా ఉందన్నారు.
ఇక కొత్తగా టీవీకే పార్టీ పెట్టిన నటుడు విజయ్ ఇంకా పార్టీ గుర్తు తీసుకోలేదని, ఆయన ఏ చిహ్నం తీసుకోనున్నారో తెలియదన్నారు. ఓ పార్టీ కూటమికి వ్యతిరేకంగా అన్నీ పార్టీలు వేర్వేరుగా పోరాడుతున్నాయని, అవన్నీ ఒకే గొడుగు కిందికి రావాలని కస్తూరి తెలిపారు. ప్రజల సమస్యలన్నింటికీ అధికార పార్టీనే కారణమన్న మానసికస్థితికి వచ్చేశారన్నారు.
ఇక తాను జైలుకు వెళ్లినప్పుడు తనకు మద్దతుగా మొదట మాట్లాడిన తొలి వ్యక్తి సీమాన్ అని ఆమె పేర్కొన్నారు. అందుకు ఆయనకు కృతజ్ఞతలు తెలిపారు. అయితే, సీమాన్ కూడా ఈసారి ఎన్నికల్లో ఒంటరిగానే పోటీ చేయాలనుకుంటున్నారని కస్తూరి చెప్పారు. డీఎంకేను చిత్తుగా ఓడించాలంటే అన్ని పార్టీలు ఏకం కావాలని ఆమె పిలుపునిచ్చారు.
