అయితే, ఈ చిత్రాన్ని తెలంగాణ రాష్ట్ర గవర్నర్ తమిళిసై సౌందర్ రాజన్ వీక్షించారు. వారి కోసం ప్రత్యేక షోను చిత్ర యూనిట్ వేసింది. ఈ చిత్రాన్ని వీక్షించిన తర్వాత గవర్నర్ తమిళిసై సౌందర్ రాజన్ మాట్లాడుతూ, గడచిన 20 సంవత్సరాల్లో తాను చూసిన రెండో చిత్రం చిరంజీవి నటించిన 'సైరా' అని చెప్పారు.
చిత్రంలో చిరంజీవి అద్భుతంగా నటించారని కితాబిచ్చారు. 1999 తర్వాత తాను 2018లో రజనీకాంత్ నటించిన 'కాలా' చూశానని, ఆపై తాను చూసిన రెండో చిత్రం ఇదేనని ఆమె అన్నారు. ఈ చిత్రాన్ని 130 కోట్ల మంది భారతీయులు చూడాలని కోరారు.
తమిళిసై కోసం సినిమాను ప్రత్యేకంగా ప్రదర్శించగా, ఆమె కుటుంబ సభ్యులతో పాటు, చిరంజీవి కుటుంబీకులు కూడా సినిమా చూశారు. కాగా, ఉయ్యాలవాడ నరసింహారెడ్డి జీవిత చరిత్ర ఆధారంగా దర్శకుడు సురేందర్ రెడ్డి తెరకెక్కించిన 'సైరా' విజయవంతంగా నడుస్తున్న సంగతి తెలిసిందే.
ఈ చిత్రాన్ని హీరో రామ్ చరణ్ నిర్మించగా, ఇందులో అమితాబ్ బచ్చన్, నయనతార, తమన్నా, జగపతిబాబు, కిచ్చా సుధీప్, విజయ్ సేతుపతి వంటి అగ్ర నటీనటులంతా నటించారు. మొత్తం రూ.250 కోట్ల భారీ బడ్జెట్‌తో చిత్రాన్ని నిర్మించారు.
