ఒకటి మాత్రం నిజం. బాహుబలి సినిమాతో ప్రభాస జన్మ ధన్యమైందనే చెప్పాలి. అయిదేళ్ల అమూల్యమైన సమయాన్ని రాజమౌళి చేతుల్లో పెట్టిన ప్రభాస ఒక జీవితానికి సరిపడిన కాన్వాస్‌ను తన చుట్టూ గీసుకున్నాడు. ముంబైలో గురువారం నిర్వహించిన ట్రైలర్ రిలీజ్ కార్యక్రమంలో ప్రభాస్ మాట్లాడుతూ, రెండే రెండు మాటలన్నాడు. థ్యాక్స్ రాజ్.. దర్శక మాంత్రికుడు రాజమౌళికి ప్రభాస్ చెప్పిన రెండు ముక్కల హృదయపూర్వక కృతజ్ఞత అది.
ఎప్పుడెప్పుడా అంటూ ఆసక్తిగా ఎదురుచూస్తున్న ‘బాహుబలి: ది కన్‌క్లూజన్‌’ ప్రచార చిత్రం వచ్చేసింది. 140 సెకన్ల నిడివి ఉన్న ఈ టీజర్‌ వస్తూ వస్తూ ‘బాహుబలి 2’పై అంచనాల్ని మరింతగా పెంచేసింది. ‘‘అమరేంద్ర బాహుబలి అను నేను అశేషమైన మాహీష్మతీ ప్రజల ధన మాన ప్రాణ సంరక్షకుడిగా ప్రాణ త్యాగానికైనా వెనుకాడబోనని రాజమాత శివగామి దేవి సాక్షిగా ప్రమాణం చేస్తున్నాను’’ అనే ప్రభాస్ డైలాగ్‌తో ట్రైలర్ ప్రారంభమైంది. మిలియన్‌ డాలర్ల ప్రశ్నకు తావిచ్చిన కట్టప్ప బాహుబలిని కత్తితో పొడిచిన షాట్‌ కూడా ఇందులో ఉంది.
కొండంత ఏనుగు తలపై నుంచి కారుతున్న నీటి ధార లాంటి దృశ్యాలతో మరో కొత్తలోకంలోకి తీసుకెళ్లారు రాజమౌళి. మాహీష్మతీ సామ్రాజ్యం, రాజదర్బార్‌, వేలాది సైన్యం, వాళ్లతో యుద్ధం, ఏనుగులు, గుర్రాలూ, బాణాలు అన్నింటికి మించిన భావోద్వేగాలు.. ట్రైలర్‌లో కనిపించాయి. ‘‘నువ్వు నా పక్కనుండేంత వరకూ నన్ను చంపే మగాడు ఇంత వరకూ పుట్టలేదు మామా’’ అంటూ ప్రభాస్ కట్టప్పని ఉద్దేశించి చెప్పిన డైలాగ్‌... ఈ ప్రచార చిత్రానికే ప్రత్యేక ఆకర్షణగా నిలిచింది. ప్రభాస్ - రానా నువ్వా నేనా అంటూ తలపడే షాట్‌తో ప్రచార చిత్రాన్ని ముగించారు.
