రాజకీయాలు అంటేనే అంతే. అధికారం వున్నవారి వైపే అంతా వుంటుంది. ఓటమి పాలయితే పట్టించుకునేవారుండరు. ఐతే ఓడినా కనీసం ఆ పార్టీ నుంచి గెలిచినవారు పార్టీకి కాస్తాకూస్తో వెన్నుదన్నుగా వుంటుంటారు. కానీ జనసేనకు ఆ పరిస్థితి కనబడటంలేదు. ఆ పార్టీ నుంచి గెలిచిన ఒకే ఒక్కడు రాపాక వరప్రసాద్ పార్టీ అధినేత గాలి తీసేసే వ్యాఖ్యలు చేసి తీవ్ర చర్చకు తెరలేపారు. గెలవలేని వారు కూడా నాపై పెత్తనం చెలాయించాలనుకోవడం ఆశ్చర్యంగా వుందంటూ వ్యాఖ్యానించారు.
తనకు ఎవరో షోకాజ్ నోటీసు ఇవ్వడం ఏంటి? తను గెలిచిన ఎమ్మెల్యేననీ, ఓడిపోయినవాళ్లు తనకు షోకాజ్ ఇవ్వడం ఏంటంటూ ప్రశ్నించారు. పార్టీ మీద కాస్తో కూస్తో అధికారం ఎవరికైనా వున్నదని అనుకుంటే అది తనకు మాత్రమే వున్నదంటూ వ్యాఖ్యానించారు. అసలు తను జనసేన పార్టీ వల్ల గెలవలేదనీ, స్వశక్తితో గెలిచానన్నారు.
