మాస్టర్ బ్లాస్టర్ సచిన్ టెండూల్కర్ స్టంప్ అవుట్ కావడానికి డాషింగ్ ఓపెనర్ వీరేంద్ర సెహ్వాగే కారణమట. సంప్రదాయ టెస్టు క్రికెట్ జీవితంలో ఒకే ఒక్కసారి స్టంపౌట్ అయ్యాడు. 2001లో ఇంగ్లాండ్‌ స్పిన్నర్‌ ఆష్లే గైల్స్‌ వేసిన బంతిని ఆడేందుకు ముందుకు వచ్చి స్టంపౌట్ అయ్యాడు. ఇక ఆనాటి సచిన్ అవుట్ కు తనదే బాధ్యతని, తాను చెప్పిన మాటలు విని, సచిన్ వాటిని పాటించి అవుట్ అయ్యాడని, ఆ పాపం తనదేనని సెహ్వాగ్ చెప్పుకొచ్చాడు.
ఆష్లే గైల్స్‌ సచిన్ టెండూల్కర్‌కు బౌలింగ్ చేసేటప్పుడు లెగ్ సైడ్ వికెట్‌కు దూరంగా బంతులేస్తూ, సచిన్ టెండూల్కర్‌ను ఇబ్బంది పెడుతున్నాడని.. తాను సులభంగా ఆడుతుంటే.. సచిన్ ప్యాడ్లు అడ్డుపెడుతూ ఇబ్బంది పడ్డాడని సెహ్వాగ్ చెప్పాడు.
ఆ సమయంలో సచిన్ వద్దకెళ్లి బంతి స్పిన్ కావట్లేదని.. ముందుకొచ్చి షాట్లు ఆడమని చెప్పానని.. కానీ దురదృష్ట వశాత్తూ... సచిన్ ముందుకొచ్చిన బంతే స్పిన్ అయ్యిందని.. అలా సచిన్ తొలిసారి స్టంపౌట్ అయ్యాడని చెప్పుకొచ్చాడు. ఆ రోజు తాను డ్రెస్సింగ్‌ రూంకే వెళ్లలేదు. అంపైర్ల గదిలోనే ఉన్న తనకు సచిన్ నుంచి పిలుపొచ్చింది. టెస్టుల్లో తొలిసారి స్టంపౌట్ అయ్యానని, అందుకు కారణం తానేనని అప్పుడు సచిన్ చెప్పినట్లు సెహ్వాగ్ గుర్తు చేసుకున్నాడు.
