ఆఫ్ఘన్ తాలిబన్, హక్కానీ నెట్‌వర్క్‌లను నిర్మూలించాలని అమెరికా స్పష్టం చేస్తూవస్తోంది. కానీ, పాక్ పాలకులు మాత్రం పెడచెవిన పెడుతూనే వస్తున్నారు. దీనిపై ప్రస్తుత అధ్యక్షుడు డోనాల్డ్ ట్రంప్ కఠిన నిర్ణయం తీసుకున్నారు. ఎన్నో ఏళ్లుగా అమెరికా నేతలను పిచ్చోళ్లను చేస్తూ పాకిస్థాన్ అబద్ధాలు చెబుతూ మోసం చేసిందంటూ ట్రంప్ సంచలన వ్యాఖ్యలు చేశారు. పైగా, ఇక ఏమాత్రం సాయం చేయబోమని కూడా ఆయన స్పష్టంచేశారు.
మరోవైపు అమెరికా ఆర్థిక సాయాన్ని నిలిపి వేయడంతో పాక్ విలవిల్లాడుతోంది. పరిస్థితిని పూర్వస్థితికి తెచ్చేందుకు పాక్ ప్రధాని అబ్బాసీ చర్చోపచర్చలు జరుపుతున్నారు. పాక్ మిత్ర దేశం చైనా ఎప్పట్లానే తన ఒంటెద్దు పోకడలను ప్రదర్శించింది. పాకిస్థాన్ చాలా మంచి దేశమని... ఉగ్రవాదులపై పోరాటంలో భాగంగా ఎన్నో త్యాగాలు చేసిందని ప్రశంసించింది. ఉగ్రవాదంపై పోరాటం చేస్తోందని కితాబిచ్చింది.
