"సత్యం" సినిమా ద్వారా తెలుగు తెరకు పరిచయమైన చిలిపి నవ్వుల ముద్దుగుమ్మ జెనీలియా డిసౌజా. ఆగస్టు ఐదోతేదీ, 1987లో పుట్టిన జెనీలియా.. తెలుగు, తమిళం, హిందీ, కన్నడ భాషల్లో పలు చిత్రాల్లో నటించింది.
బాలీవుడ్ గ్రాండ్ ఫాదర్ అమితాబ్ బచ్చన్‌తో పార్కర్ పెన్ వ్యాపార ప్రకటన చిత్రం (యాడ్ ఫిలిమ్) ద్వారా వెలుగులోకి వచ్చిన జెన్నీ.. హిందీలో "తుజే మేరి కసం"తో తెరంగేట్రం చేసింది.
ఇలా ఉత్తరాది నుంచి దక్షిణాదికి వచ్చిన జెనీలియా తాజాగా తెలుగులో "సత్య ఇన్ లవ్" అనే చిత్రంలో నటిస్తోంది. సాంబ, సై, హ్యాపీ, రామ్, ఢీ వంటి చిత్రాల్లో నటించిన జెనీలియాకు "బొమ్మరిల్లు" చిత్రం మొదటి ఫిలిం ఫేర్ అవార్డును (ఉత్తమ నటి అవార్డు) సంపాదించిపెట్టింది. ప్రస్తుతం హిందీ, తెలుగు, తమిళ చిత్రాల షూటింగ్‌లలో బిజీబిజీగా ఉన్న జెన్నీని కదిలిస్తే ఇలా చెప్పుకొచ్చింది.
ప్రశ్న: "సత్య ఇన్ లవ్"లో మీది ఎలాంటి పాత్ర? జ: వైవిధ్యంగా ఉంటుంది. ఇప్పుడే ఆ పాత్ర గురించి చెప్పను.
ప్రశ్న: మీది లవ్ మ్యారేజా? అరేంజ్ మ్యారేజా? జ.. తప్పకుండా నాది లవ్ మ్యారేజే.
ప్రశ్న: మీకు భర్తగా వచ్చే వ్యక్తి ఎలా ఉండాలి? జ: సామాన్యంగా మగాడంటే ఆడదాన్ని గౌరవించే మనస్తత్వం కలిగి ఉండాలి. అదే నేను కోరుకుంటా. ఇద్దరిలోనూ ఒకరినొకరు అర్థం చేసుకునే విధానం ఉండాలి. నేను చెప్పే విషయాన్ని చెవొగ్గి వినడం చేయాలి.
అలాకాకుండా అధికారం చెలాయించకూడదు. ప్రేమతో మెలిగే వ్యక్తికే నేను ఫుల్ మార్కులు వేస్తానంటూ మినీ ఇంటర్వ్యూ ఇచ్చి సీన్ టేక్ వచ్చేసిందంటూ వెళ్లిపోయింది.
