ఇక మెక్సికో తాను ఆడిన గత ఆరు ప్రపంచకప్పుల్లోనూ నాకౌట్‌ దశకు అర్హత సాధించింది. ఈసారి కూడా ముందంజ వేయడం దాదాపుగా ఖాయమని తెలుస్తోంది. కానీ నాకౌట్‌ చేరాలంటే జర్మనీ ఆట తీరు మాత్రం చాలా మెరుగుపడాల్సి వుందని క్రీడా విశ్లేషకులు అంటున్నారు. ఇంకా స్వీడన్‌, దక్షిణ కొరియాలతో ఆ జట్టు తలపడాల్సి వుంది. గత రెండు ప్రపంచకప్‌లలో డిఫెండింగ్‌ ఛాంపియన్స్‌ గ్రూప్‌ దశలోనే నిష్క్రమించడం జర్మనీని కలవర పెట్టే అంశం.
మరోవైపు ఫిఫా వరల్డ్ కప్‌లో సెర్బియా శుభారంభం చేసింది. అలెగ్జాండర్‌ కొలరోవ్‌ సంచలన ఫ్రికిక్‌ గోల్‌తో ఆదివారం జరిగిన గ్రూప్‌-ఈ మ్యాచ్‌లో 1-0తో కోస్టారికాపై విజయం సాధించింది. తొలి అర్ధభాగంలో అత్యుత్తమ గోల్‌ అవకాశం కోస్టారికాకే వచ్చింది. ఈ టోర్నీకి ముదు సెర్బియా తాను ఆడిన గత ఆరు ప్రపంచకప్పుల్లో ఒకే విజయం సాధించడం విశేషం. ఈ విజయంతో గ్రూప్‌ నుంచి నాకౌట్‌ రేసులో సెర్బియా ముందు నిలిచింది. ఈ జట్టు ఇంకా బ్రెజిల్‌, స్విట్జర్లాండ్‌లతో మ్యాచ్‌లు ఆడాల్సివుంది.
