పాతకాలం నాటి భావాలు గల వ్యక్తి ఇప్పటి హైటెక్‌ యుగంలో తన పెండ్లి కోసం ఎటువంటి ప్రయత్నాలు చేశాడు? ఈ క్రమంలో ఆయన ఎదుర్కొన్న అనుభవాలు ఏమిటనేది ఆద్యంతం వినోదభరితంగా తెరకెక్కిస్తున్నట్లు 'అతడు ఆమె ఓ స్కూటర్‌' చిత్రం గురించి దర్శకుడు గంగారపు లక్ష్మణ్‌ తెలియజేశారు.
పిరమిడ్‌ క్రియేషన్స్‌ పతాకంపై అమరేంద్రరెడ్డి నిర్మిస్తున్న ఈ చిత్రంలో వెన్నెలకిషోర్‌, ప్రియాంక చాబ్రా హీరోహీరోయిన్లుగా నటిస్తున్నారు. ఈ చిత్రం శరవేగంగా షూటింగ్‌ జరుపుకుంటోంది. నిర్మాత మాట్లాడుతూ, ఆద్యంతం వినోదాత్మకంగా రూపొందే ఈ చిత్రంలో వెన్నెల కిషోర్‌ అద్బుతంగా నటించాడు. కథ రీత్యా ఆయన పాత్ర చాలా సూటయింది. ప్రస్తుతం టాకీ పూర్తయింది. నవంబర్‌ 7నుంచి ఫిలింసిటీలో పాటలను చిత్రీకరిస్తున్నాం. డిసెంబర్‌లో సినిమాను విడుదల చేయడానికి సన్నాహాలు చేస్తున్నామని తెలిపారు.
కిషోర్‌ మాట్లాడుతూ, ఈ చిత్ర కథ వినకముందు హీరోగా చేయడం అవసరమా! అనిపించింది. దర్శకుడు కథను మార్చిన విధానం చాలా ఉత్కంఠను కల్గించింది. పూర్తి వినోదాత్మకంగా సాగే ఈ చిత్రంలో నటించడం చాలా ఆనందంగా ఉందని అన్నారు.
